रेसुङ्गाबाट एक वर्षको अवधिमा ७०० बढीले पाए हवाई सेवा
२२ चैत, गुल्मी । गुल्मी जिल्लाको रेसुङ्गा विमानस्थलबाट गत वैशाखयता ७ सय बढी नागरिकले हवाई सेवा पाएका छन् ।
२०८० सालको वैशाख अन्तिम साताबाट नेपाल एअरलाइन्सको ट्वीनअटर जहाजले रेसुङ्गामा सेवा सुरु गरेको थियो । त्यसयता भएका ६२ वटा उडानबाट ७२७ जनाले सेवा लिएको रेसुङ्गा विमानस्थलका स्टेशन प्रमुख सुमन थापाले जानकारी दिए ।
रेसुङ्गमा जेठ अन्तिम सातादेखि दुई महिना बर्खाको समयमा भने उडान बन्द भएको थियो । बर्खायाम सकिएपछि भदौ अन्तिम साताबाट पुनः उडान शुरु भएको थियो । त्यसयता छिटफुट बाहेक नियमित उडान हुँदै आएको छ ।
गुल्मी–काठमाडौंका लागि हप्ताको तीन दिन (सोमबार, बुधबार र शुक्रबार) उडान हुँदै आएको छ । रेसुङ्गा–काठमाडौंका लागि सुरुमा बुधबार र शुक्रबार मात्र उडान हुने गर्दथ्यो । यात्रुको चाप बढेपछि थप एक दिन सोमबार पनि सेवा थपिएको हो ।
अहिले गुल्मीबाट काठमाडौंका लागि ७ हजार ८० र काठमाडौंबाट गुल्मीका लागि ७ हजार २८० रुपैयाँ भाडा छ ।
– यस समाचारको श्रोत : Online Khabar हो ।