सडक सजावट बत्तीले पार्ने वातावरणीय असरबारे अध्ययन हुने
२५ वैशाख, काठमाडौं । काठमाडौं महानगरपालिकाले सहरका विभिन्न स्थानमा सजावटका लागि जडान गरिएको बत्तीको असरबारे अध्ययन गर्ने भएको छ ।
सहरमा भएका रुख, चोकका पोल, पुलका पिल्लरहरूमा महानगरले सजावटका लागि बत्तीहरू जडान गरेपछि वातवारण प्रेमीहरूले यस कार्यको विरोध जनाउँदै आएका छन् ।
केही अभियन्ताहरूले रुखमा लगाएको झिलिमिली बत्तीले रातिको समयमा प्रकाश प्रदूषण भएको भन्दै तार काटिदिएका थिए । यस्तै चराचुरुङ्गी, साना किरालाई बत्तीको कारण समस्या परेको भन्दै विरोध हुँदै आएको थियो ।
मंगलबार बसेको काठमाडौं महानगरपालिकाको अनुगमन समितिको बैठकमा सोही विषय उठेपछि सजावटका लागि जडान गरिएका बत्तीहरूको वातावरणीय, जनस्वास्थ्य, सहरी व्यवस्थापनलगायत कोणबाट अध्ययन गर्ने निर्णय भएको हो ।
उपप्रमुख सुनिता डंगोलको अध्यक्षतामा बसेको अनुगमन समितिले सजावट बत्तीले पैदल, सवारी यात्रामा कस्तो प्रभाव पार्छ ? रातको समयमा बास बस्ने तथा उड्ने चराचुरुङ्गी र अन्य जीव जनावरलाई कस्तो असर पार्छ ? भन्ने विषयमा अध्ययन गर्ने निर्णय भएको हो ।
यस्तै रुख, बिजुलीको पोलमा बेरेर राखिने बत्तीका तारले रुखलाई असर पार्छ कि पार्दैन, पार्छ भने कस्तो असर पार्ला ? भन्ने विषयमा छलफल गर्दै सामाजिक तथा व्यावसायिक जीवन, पर्यावरण र जैविक विविधता, स्वास्थ्य र सहजता जस्ता पक्षबाट अध्ययन गर्ने निर्णय भएको उपप्रमुख डंगोलले जानकारी दिइन् ।
‘सजावटका बत्ती राख्दा सकारात्मक र नकारात्मक प्रभाव के हुन् भन्ने तथ्य थाहा हुनु जरुरी छ । यसका लागि छिट्टै प्रतिवेदन आउने गरी अध्ययन गराउन भनिएको हो,’ उनले भनिन् ।
– यस समाचारको श्रोत : Online Khabar हो ।