दयाहाङ र रिश्माले गोरखाबाट थाले ‘रिमै’को छायांकन
काठमाडौं । खिलबहादुर गुरुङले निर्देशन गर्ने फिल्म ‘रिमै’को छायांकन मंगलबारदेखि सुरु भएको छ । गोरखाको सिरानचोकमा शुभमुहूर्त पूजा गर्दै छायांकन थालिएको निर्देशक गुरुङले जानकारी दिए ।
मुहूर्त सटमा अभिनेता दयाहाङ राई र अभिनेत्री रिश्मा गुरुङले साथ दिए । यी दुई कलाकार ‘कबड्डी’को भाग १ र २ पछि पुनः एकसाथ देखिन लागेका हुन् ।
गोरखाको सिरानचोक, झारगाउँ, कुलगाउँ, भंगेरी, लासे, सिम्ले, गोहरे, चित्रेपोखरी र गोर्खा बजारमा एक महिनासम्म छायांकन चल्नेछ । रोहित कट्टेल प्रस्तुतकर्ता रहेको फिल्मका कार्यकारी निर्माता रत्न श्रेष्ठ हुन् ।
गोरखा सिरानचोक एण्ड लिगगिगकोट फिल्म्स प्रालिको प्रस्तुतिमा आरआर फिल्म्स र रोटेपिङ इन्टरटेनमेन्टले फिल्म निर्माण गर्न लागेका हुन् । फिल्ममा बुद्धि तामाङ, गौमाया गुरुङ, कविता आले मगर, माओत्से गुरुङ, पुस्कर गुरुङ, वीरबल घले, डिबी गुरुङ लगायतका कलाकारको अभिनय हुनेछ ।
वीरबल घले, टीका गुरुङ र दुनबहादुर घले निर्माता रहेको सिनेमामा बिनु गुरुङ, रोशन भट्टराई र राजेश घिमिरे सहनिर्माताको रुपमा छन् । उपेन्द्र सुब्बाको लेखन रहेको फिल्मलाई शैलेन्द्रध्वज कार्कीले छायांकन गर्नेछन् ।
किरण चाम्लिङ राई मुख्य सहायक निर्देशक, विष्णु मैनाली प्रोडक्सन म्यानेजर र मित्र डी गुरुङको सम्पादन रहनेछ । फिल्मलाई आरआर फिल्म्सले वितरण गर्नेछ ।
– यस समाचारको श्रोत : Online Khabar हो ।