समीर भट्टबारे सन्तोष सेन : ‘ऊ विश्व चिनाउने कलाकार तर इन्डस्ट्रीका कसैले साथ दिएनन्’

काठमाडौं । फिल्म निर्माता तथा निर्देशक सन्तोष सेनले घरेलु फिल्ममा समीर भट्टको उदयलाई लिएर इन्डस्ट्रीले साथ नदिएको बताएका छन् । बुधबार भिडियो सन्देश जारी गर्दै उनले समीरको उदयलाई काठमाडौं महानगरपालिकाका मेयर बालेन शाहसँग तुलना गरे ।

सेनले भने, ‘जसरी महानगरमा बालेनको उदय भएको थियो, त्यस्तै उदय समीर भट्टको हो । पूर्णरुपमा तयार भएर आएको थियो तर इन्डस्ट्रीको एकजनाले पनि उसलाई सपोर्ट गरेन ।’

समीरको आगमनलाई लिएर फिल्म उद्योगका कोही पनि खुसी नरहेको उनले बताए । ‘ऊ जसरी इन्डस्ट्रीमा तयार भएर आयो, यसप्रति कोही पनि खुसी छैनन्’ सेनले भने, ‘विराज भट्टजस्तो सुपरस्टारले आफ्नो छोरालाई १०-१५ वर्षसम्म तयार पारेर विश्व के हो भनेर हिंड्ने डुल्ने उमेरमा ट्रेनिङमा हालेर योद्धा बनाउनु चानचुने कुरा हो ? समीरलाई घुम्न मन थिएन होला र ?’

‘उसले दिनरात ट्रेनिङ गर्नुपर्ने केको लागि ? यहाँ त रिलिज भएको २-३ दिन भयो, सपोर्ट गर्ने कोही निस्किंदैन’ सेनले भने, ‘एउटा नवनायक आएको छ, इन्डस्ट्रीमा केही गर्छु भनेर । वेलकम र सपोर्ट गर्नुपर्‍यो । हामी सधैं पुरानै ढर्रामा रमाएर त हुँदैन ।’

उनले समीर भट्ट नेपाली फिल्मलाई विश्वमा चिनाउने कलाकार बन्ने दाबी गरे । ‘एउटा नयाँ अनुहार आएको छ, यसलाई कसरी ब्रान्डिङ गर्ने ? अब यो मान्छे भनेको नेपाली चलचित्र क्षेत्रमा मात्रै होइन । अब विश्वमा चिनाउने नयाँ नेपाली कलाकार एउटा मात्रै हुन्छ’ सेनले भने ।

नयाँ कलाकारलाई साथ दिंदा जुनसुकै फिल्मले राम्रो व्यापार गर्न सक्ने सेनको विश्लेषण छ । ‘अब नयाँ जो पनि आउँछ, कलामा मेहनत गरेर जो पनि आउँछ, हामी सबै मिलेर सपोर्ट गरौं । नयाँ नयाँ अनुहारबाट दर्शकलाई चलचित्र दिन सक्छौं’ उनले भने ।

जुनसुकै जनराको फिल्म भएपनि मेकरलाई मद्दतको जरुरी रहेको उनको भनाइ छ । ‘नयाँ र पुरानो पुस्तालाई सँगै मिलाएर जुनसुकै जनरा होस्, हामी सबै एक भएर सबै जनरालाई सपोर्ट गर्नुपर्छ’ सेनले भने, ‘दर्शकलाई फरक फरक स्वाद दिन सक्नुपर्छ । हामी सबैले समीर भट्टलाई साथ सपोर्ट दिऊँ । सबै फिल्मलाई साथ दिऊँ, गाली नगरौं । आम दर्शकलाई मेरो बिन्ती छ ।’

उनले झण्डै आधा घण्टा लामो उक्त भिडियोमा समीर अभिनित फिल्म ‘१२ गाउँ’बारे आफूलाई लिएर भइरहेका आरोपको खण्डन प्रयास समेत गरेका छन् ।

समीरले यतिबेला सन्तोषले निर्देशन गरिरहेको फिल्म ‘बलिदान’ छायांकन गरिरहेका छन् । यो फिल्मको दोस्रो चरणको छायांकन सुरु हुने तयारीमा छ । अनलाइनखबरसँगको कुराकानीमा सेनले चाँडै फिल्मको प्रदर्शन मिति तय हुने बताए ।

– यस समाचारको श्रोत : Online Khabar हो ।