विज्ञहरुको सुझाव अनुसार उच्च शिक्षा विधेयक संशोधन हुन्छ : शिक्षा सचिव अधिकारी

१८ माघ, काठमाडौं । विज्ञहरुको सुझाव अनुसार उच्च शिक्षा विधेयक संशोधन हुने शिक्षा सचिव सुरेश अधिकारीले बताएका छन् ।

विश्वविद्यालय अनुदान आयोगले आयोजना गरेको छलफलमा सहभागी विज्ञहरुले विधेयकमा समेटिएका विषयहरु माथि प्रश्न उठाउँदै विधेयक पुनर्लेखन नै गर्नुपर्ने सुझाव दिएपछि शिक्षा सचिव अधिकारीले विज्ञहरुको सुझाव अनुसार संशोधन गर्न सकिने बताए ।

उनले भने ‘अहिलेको यो ड्राफ्ट हो त्यसमा यहाँहरुले दिनुभएको सुझाव अनुसार संशोधन गर्न हामी तयार छौं ।’ मन्त्रालयले उच्च शिक्षा विधेयकमा सुझाव माग गर्दै सार्वजनिक गरेको छ । उक्त विधेयकमा कर्मचारीतन्त्र तथा राजनीतिक हावी हुने किसिमले विधेयक लेखिएको भन्दै पुर्नलेखन गर्नुप्र्ने विज्ञहरुले जोड दिएका थिए ।

विश्वविद्यालयको शासकीय संरचना परिवर्तन गरेर बोर्ड अफ ट्रष्टी बनाउनुपर्ने र प्रधानमन्त्री स्वयंले पनि राजनीतिक हस्तक्षेपमुक्त बनाउने प्रतिवद्धता गरिरहेको बेलासार्वजनिक भएको विधेयकमा विश्वविद्यालयको उपकुलपति प्रधानमन्त्री हुने प्रावधानमाथि विज्ञहरुले प्रश्न गरेका थिए ।

शिक्षा सचिव अधिकारीले विश्वविद्यालयको शासकीय संरचना परिवर्तन गर्न सकिने बताए । उनले भने ‘प्रधानमन्त्री ज्यूले कुलपतिमा प्रधानमन्त्री हुने व्यवस्था नराख्नुस समय दिन सकिँदैन भन्नु भएको छ, त्यसैले ट्रष्टिजको मोडलमा पनि जान सकिन्छ ।’

कार्यक्रममा त्रिवि योजना आयोगका सदस्य रमेशचन्द्र पौडेलले शिक्षा विज्ञान तथा प्रविधि मन्त्रालयले सार्वजनिक गरेको उच्च शिक्षा विधेयक निर्माणमा कर्मचारीतन्त्र हावी भएको बताए । उनले भने ‘विश्वविद्यालय, प्रस्तावित उच्च शिक्षा आयोग र सेवा आयोगमा सचिव, पूर्व सचिव र सहसचिवलाई समेट्न खोजिएको छ ।’

– यस समाचारको श्रोत : Online Khabar हो ।