साफ यू-१९ महिला च्याम्पियनसिपमा नेपालले आज भुटानसँग खेल्दै
२१ माघ, काठमाडौं । बंगलादेशको ढाकामा जारी साफ यू-१९ महिला च्याम्पियनसिपमा नेपालले आफ्नो दोस्रो खेलमा आज भुटानसँग खेल्दैछ ।
खेल ढाकास्थित बीएसएसएस मोस्ताफा कमल स्टेडियममा नेपाली समय अनुसार दिउँसो पौने ३ बजे सुरु हुनेछ ।
फाइनल पुग्ने सम्भावना कायम राख्न नेपालले आजको खेल जित्नैपर्ने अवस्थामा छ ।
चार टोली सहभागि च्याम्पियनसिपको पहिलो खेलमै नेपाल आयोजक टोली बंगलादेशसँग ३-१ ले पराजित भएको थियो ।
सिंगल राउण्ड रोविनका आधारमा भइरहेको च्याम्पियनसिपमा लिगपछि शीर्ष दुईमा रहने टोलीले फाइनल खेल्नेछन् । त्यसैले शीर्ष दुईमा रहँदै फाइनल पुग्न नेपालका लागि आजको खेल महत्वपूर्ण हुनेछ ।
भुटान भने पहिलो खेलमा भारतसँग १०-० को फराकिलो अन्तरले पराजित भएको थियो ।
नेपालले अहिलेसम्म च्याम्पियनसिपको उपाधि जित्न सकेको छैन । अहिलेसमम् भएको पाँच संस्करणमध्ये बंगलादेशले ३ तथा भारतले २ पटक उपाधि जितेको छ ।
– यस समाचारको श्रोत : Online Khabar हो ।