सामाजिक सञ्जालमार्फत ५६ लाख ठगी गरेको आरोपमा एक जना पक्राउ
१४ साउन, काठमाडौं । सामाजिक सञ्जालमार्फत सम्पर्क गरी ५६ लाख रुपैयाँ भन्दा बढी ठगी गरेको आरोपमा एक जना पक्राउ परेका छन् ।
पक्राउ पर्नेमा सिरहा घर भएका २७ वर्षीय इम्तियाज अहमद छन् । उनलाई काठमाडौं उपत्यका अपराध अनुसन्धान कार्यालयको टोलीले आइतबार सिरहाको लहानबाट पक्राउ गरी काठमाडौं ल्याइएको हो ।
उनलाई ठगीको कसुरमा कारबाहीका लागि जिल्ला प्रहरी परिसर काठमाडौं पठाइएको अपराध अनुसन्धान कार्यालयका एसपी तथा प्रवक्ता काजीकुमार आचार्यले बताए ।
सामाजिक सञ्जालमार्फत विभिन्न व्यक्तिहरुसँग सम्पर्क गरी विदेशमा रहेका एक नेपाली व्यक्तिको कोभिडका कारण मृत्यु भएको उनले बताउने गरेका थिए । अहमद आफूले समेत विदेशी नागरिक बनेर सामाजिक सञ्जालमा कुराकानी गर्ने गरेका थिए ।
विदेशमा मृत व्यक्तिको बैंकको खातामा ठूलो रकम रहेकोले उक्त रकम लिन भन्दै त्यसको उत्तराधिकारी बनाउने प्रलोभन देखाएर उनले ठगी गरेको आरोप छ । यो शैलीमा उनले ५६ लाख १० हजार ६९९ रुपैयाँ ठगी गरेको प्रहरीको भनाइ छ ।
– यस समाचारको श्रोत : Online Khabar हो ।