नेपाली सुपरहिरोको कथामा साइन्स-फिक्सन वेब सिरिज ल्याउँदै नेप-ग्याजम
काठमाडौं । युवापुस्तामाझ चर्चित स्ट्यान्डअप कमेडियन समूह नेप-ग्याजमले विज्ञान कथामा आधारित वेब सिरिज ल्याउने भएको छ । ‘फर्ज अफ डन’ नाम राखिएको यो साइन्स-फिक्सन सिरिज साउनदेखि स्ट्रिमिङको तयारी छ ।
नेपाली धामीझाँक्री, माता, तान्त्रिकमा आधारित रहेर सिरिज बनाउन लागेको निर्माता तथा नेप-ग्याजम समूहका संस्थापक आशिष शाहीले बताए ।
‘हाम्रो आफ्नै सुपरहिरो किन नहुने ? इण्डियामा क्रिस र ब्रह्मास्त्र छन् । हलिउडले ‘डक्टर स्ट्रेन्ज’ यहीं बनाएको हो । हामीले पनि हाम्रै चीजलाई देखाउँछौं,’ उनले भने । यो सिरिजलाई स्वरांकन गरेर विदेशी भाषामा समेत रिलिज गर्ने समूहको तयारी छ ।
प्रदीप खड्गीले निर्देशन गर्ने सिरिजमा सनिश शाक्य, अर्पण तामाङ, सुचित्रा उप्रेती, रोमन सागर रेग्मी, सुरज व्यञ्जनकार, लक्ष्मीकुमार महर्जनको अभिनय हुनेछ ।
१३ एपिसोडसम्म सिरिज रिलिज गर्ने योजना बनाइएको वेब सिरिज निर्माणका लागि ४०–४५ लाख रुपैयाँ खर्च हुने जनाइएको छ । भीएफएक्सको अधिकतम प्रयोग गरेर सिरिज बनाउने तयारी छ ।
नेप-ग्याजम समूह साइन्स–फिक्सन वेब सिरिजपछि वेब सिटकम निर्माणमा पनि जुटेको छ । निर्माता शाही यो सिटकमलाई सहरी क्षेत्रको ‘तीतो सत्य’ भन्न रुचाउँछन् ।
‘तीतो सत्यले गाउँ समाजको यथार्थलाई कमेडी शैलीमा पस्कियो, हामी सहरी क्षेत्रको तीतो सत्य देखाउँछौं । यसलाई अर्बन तीतो सत्य पनि भन्न सकिन्छ,’ उनले भने ।
यसरी जन्मियो नेप–ग्याजम
इन्टरनेटमा रमाउने तन्नेरी पुस्तामाझ नेप-ग्याजम चर्चित स्ट्यान्डअप कमेडियन समूह हो । सन् २०१८ मा जतिबेला युट्युबमा भ्लग र छोटा कमेडी भिडियो बनाउने हाइप थियो, त्यो बिन्दुबाट नेप–ग्याजमले स्ट्यान्डअप कमेडीको ट्रेन्ड थालेको हो ।
आशिष शाही, ज्ञानेन्द्रराज मिश्र र सन्तोष देवकोटा समूहका सक्रिय सदस्य हुन् । उनीहरुकै पहलमा नेप-ग्याजमले प्रसिद्धिको उडान भरिरहेको छ ।
पहिलो भिडियो पोस्ट गरेदेखि नै नेप-ग्याजमको चर्चा हुन थाल्यो । संस्थापक सदस्य शाही पहिलो कन्टेन्टको रुपमा लेखमणि त्रितालको भिडियो हालेको क्षण सम्झिन्छन् ।
‘जिरो सब्सक्राइबर भएको च्यानलबाट हाम्रो यात्रा सुरु भएको हो । पहिलो भिडियो राखेपछि इन्गेजमेन्ट राम्रो भयो । १०० भ्युज आउनु पनि ठूलो कुरा त्यो बेला । २४ घण्टामा दुई हजार भ्युज पुगेको थियो,’ उनी सम्झिन्छन्, ‘एउटा कमेन्ट पनि आएको थियो त्यो पोस्टमा । लेखिएको थियो- यसले नेपाली कमेडी क्षेत्रमा क्रान्ति ल्याउनेछ ।’
त्रितालले रमेश अंकलको छोरो नामक नेवारी चरित्र निर्वाह गरेका थिए । ‘यो पात्र युथमाझ ह्यापेनिङ भयो । युथले आइडलाइज गर्न थाले,’ शाही भन्छन्, ‘यसपछि भने नेप-ग्याजमले पछि फर्केर हेर्नुपरेन ।’
देश दौडाहा पूरा गरिसकेको यो समूहले काठमाडौं उपत्यकामा ६ शो गरेको छ । राष्ट्रिय नाचघर र प्रज्ञा प्रतिष्ठानको हलमा आयोजित शो हाउसफुल भए । अहिलेकी चर्चित लेडी कमेडियन सीता न्यौपानेको प्रसिद्धिको यात्रा यहींबाट सुरु भएको थियो ।
नेपाली कमेडियनमाझ अहिले सीताको हाइप छ । यति मात्र होइन, सर्वाधिक उचाइमा स्ट्यान्डअप कमेडी गिग गरेबापत सन् २०२१ मा नेप-ग्याजमले गिनिज कीर्तिमान रच्यो । कालापत्थर पुगेर यो समूहले यो रेकर्ड रचेको थियो ।
त्यसपछि नेप–ग्याजमको पाइला महजोडी स्टाइललाई पछ्याउँदै प्रहसन शैलीको स्टेज शोतर्फ अघि बढ्यो । नयाँ पुस्ताका कलाकारसँग स्टेज ड्रामा पनि गर्यो । हालै टेलिभिजन कार्यक्रम कमेडी क्लब विथ च्याम्पियन २.० मा यो समूहले निर्देशन पनि गर्यो । जसको होस्टमा मदनकृष्ण श्रेष्ठका छोरा यमन र अध्यक्ष अभिनेता राजाराम पौडेल थिए ।
नेप-ग्याजमको अर्थ सन्तुष्टि दिनु भन्ने हुन्छ । ‘हामी कमेडीको माध्यमबाट दर्शकलाई मनोरञ्जनको सन्तुष्टि दिन चाहन्छौं,’ निर्माता शाहीले भने ।
– यस समाचारको श्रोत : Online Khabar हो ।