एसोसिएटका उत्कृष्ट क्रिकेटर बास डे लिड

९ मंसिर, काठमाडौं । एसोसिएट क्रिकेट खेल्ने राष्ट्रका खेलाडीहरूमध्ये नेदरल्याण्ड्सका बास डे लिड उत्कृष्ट क्रिकेटर हुन् ।

उनले अन्तर्राष्ट्रिय क्रिकेट परिषद आईसीसीले प्रदान गर्ने ‘आईसीसी एसोसिएट क्रिकेटर अफ दि इअर २०२३’ को अवार्ड जितेका थिए ।

उनी एसोसिएट क्रिकेटर अफ दि इअरको अवार्ड जित्ने दोस्रो डच खेलाडी हुन् । यसअघि नेदरल्याण्ड्सका राएन टेन डेसकाटेले दुईपटक यो अवार्ड जितेका थिए ।

सन् २०२३ मा बास डे लिडले उत्कृष्ट प्रदर्शन गर्दै उक्त अवार्ड जिते । उनले ओडिआईमा ३१ विकेट लिए जसको उनको इकोनोमी ६.५१ थियो । यस्तै ओडिआईमा एक शतक र एक अर्शशतकसहित ४२४ रन बनाएका थिए ।

सन् २०२३ मा भारतमा भएको एकदिवसीय विश्वकमा बास डे लिडले १६ विकेट लिएका थिए । जहाँ उनले पाकिस्तानविरुद्ध ४ विकेट लिएका थिए ।

त्यतिबेला डे लिडले नेदरल्याण्ड्सका लागि खेलेर आईसीसीको अवार्ड जित्न पाउँदा एकदमै खुशी लागेको बताएका थिए ।

२५ वर्षीय एसोसिएटका उत्कृष्ट खेलाडी तथा अलराउण्डर बास डे लिड नेपाल प्रिमियर लिग एनपीएलको पहिलो सिजन खेल्न नेपाल आउँदैछन् । उनलाई पोखरा एभेन्जर्सले अनुबन्ध गरेको छ ।

नेपाली राष्ट्रिय टिमका ओपनर ब्याटर कुशल भुर्तेलसहितको खेलाडी रहेको पोखरा एभेन्जर्सबाट बास डे लिडले एनपीएल खेल्नेछन् । एसोसिएटकै उत्कृष्ट खेलाडीलाई टिममा समावेश गरेपछि पोखरा एभेन्जर्सको टिम सन्तुलित बनेको छ ।

मिडल अर्डर ब्याटिङ र बलिङ दुवैमा बास उत्तिकै महत्वपूर्ण खेलाडी हुन् । उनीसँग यसअघि पनि नेदरल्याण्ड्सको राष्ट्रिय टिमबाट नेपालमा आएर खेलिसकेको अनुभव छ ।

बास डे लिडले नेदरल्याण्ड्सको यू-१९ टिम हुदै सिनियर टिमसम्म खेलेका छन् । यसबाहेक उनले डिजर्ट भाइपर्स, नर्दन सुपरचार्जर्स, एमआई इमिरेट्स, डुर्हाम जस्ता टोलीबाट समेत खेलेका छन् ।

डे लिडको परिवारमै क्रिकेटमय थियो । उनका बुबा नेदरल्याण्ड्सका पूर्व कप्तान थिए भने उनकी कजन दिदी पनि नेदरल्याण्ड्सको महिला राष्ट्रिय टिमबाट खेल्छिन् ।
बासका बुबा टिम डे लिडले सन् २००३ र २००७ को ओडिआई विश्वकप समेत खेलेका थिए ।

सन् २००३ को विश्वापमा टिमले भारत विरुद्ध उत्कृष्ट प्रदर्शन गर्दै प्लेअर अफ दि म्यच अवार्ड समेत जितेका थिए । भारत विरुद्ध पराजित भएपनि टिमले त्यस बलाका स्टार सचिन तेन्दुलकर सहित राहु द्रविडको विकेट लिएका थिए ।

टिमले सन् १९९६ देखि २००७ सम्म नेदरल्याण्ड्सका लगि ओडिआई क्रिकेट खेले । उनले खेल्न सुरु गर्दा बास जन्मेका पनि थिएनन् ।

नेपालको पहिलो ओडिआई खेलमा बास डे लिडको डेब्यु

बास डे लिडको ओडिआईमा डेब्यु नेपाल विरुद्ध थियो । नेपालले ओडिआई मान्यता पाएपछि सन् २०१८ मा नेदरल्याण्ड भ्रमण गरेर पहिलो ओडिआई खेल खेलेको थियो ।

आम्सटलभिलमा भएको उक्त खेलमा नेपालबाट प्लेएइङ एघारमा रहेका सबै खेलाडीले ओडिआईमा डेब्यु गरे भने डच टोलीका लागि बास डे लिडसहित ५ खेलाडीले ओडिबईमा डेब्यु गरेको थियो ।

पाँचौ नम्बरमा ब्याटिङ गरेका डेब्यु ब्वाए बासले नेदरल्याण्ड्सका लगि ३० रन बनाएका थिए । उनी त्यस खेलमा आफ्नो टोलीका लागि सर्वाधिक रन बनाउनेमा दोस्रोमा थिए । माइकल रिप्पनले ५१ रन बनाएका थिए ।

यस्तै बलिङमा १.३ ओभर बलिङ गरेका बासले ३ रन खर्चेर १ विकेट लिएका थिए । उनले अन्तिममा शरद भेषावकरको विकेट लिएका थिए ।

उक्त खेलमा कप्तान पारस खड्काले ४ र सोमपाल कामीले ३ लिएपछि नेपालले नेदरल्याण्ड्सलाई १८९ रनमा अलआउट गरेको थियो ।

तर १९० रनको लक्ष्य पछ्याउँदा राम्रो सुरुवात गरेपनि नेपालले १३४ रनमा अलआउट हुँदै ऐतिहासिक खेलमा हार व्यहोरेको थियो ।

डच टोलीका फ्रेड क्लासेन, माइकल रिप्पन र पिटर सिलारेल ३-३ विकेट लिएका थिए । पहिलो विकेटका लागि नेपालले ५८ रनको साझेदारी गरेको थियो । नेपालका ओपनर ज्ञानेन्द्र मल्लले ५१ रन बनाएका थिए । ८५ रनमा दोस्रो विकेट गुमाएको नेपालले ४९ रन जोड्दा ९ विकेट गुमाएको थियो ।

नेदरल्याण्ड्सको लागि बास डे लिडको प्रदर्शन

बास डे लिडले सन् २०१७ मा नामिबिया विरुद्ध खेल्दै फस्ट क्लास क्रिकेटमा डेब्यु गरेका थिए । ओडिआई र टी२०आईमा भने उनले एकै वर्ष डेब्यु गरेका थिए ।

नेपालसँग ओडिआई डेब्युअघि उनले त्यही वर्ष जुनमा आयरल्याण्डविरुद्ध टी२०आईमा डेब्यु गरेका थिए । त्यसयता उनी नेदरल्याण्ड्सको टिममा लगातार खेलिरहेका छन् ।

बास डे लिडले नेदरल्याण्ड्सका लागि ४७ ओडिआई खेल्दै १ शतक र ५ अर्धशतक मदतमा १ हजार १११ रन बनाएका छन् । यसैगरी टी२०आईमा ४१ खेल खेल्दै ७२२ रन बनाएका छन् । जसमा उनको उच्च स्कोर अविजित ९१ रन हो ।

सबैखाले टी२०मा भने उनले ६५ खेल खेल्दै १ हजार १२५ रन बनाएका छन् । टी२० मा उनको स्ट्राइक रे६ ११२.३८ रहेको छ ।

यस्तै बलिङमा उनले ओडिआईमा ४४ विकेट लिएका छन् भने टी२०आईमा ३३ विकेट लिएका छन् । ६५ टी२० खेलमा उनले ४७ विकेट लिएका छन् । बास डे लिडले १६ फस्ट क्लास म्याच पनि खेलेका छन् ।

टी२० करियरमा उनले इंग्ल्याण्डको टी२० क्रिकेट भाइटालिटी ब्लास्टमा डुर्हामबाट १६ खेल खेल्दैका छन् । जसमा उनले २०० रन बनाउनुका साथै १० विकेट समेत लिएका छन् । भाइटालिटी ब्लास्टमा उनको स्ट्राइक रेट १२८.२० छ ।

यसैगरी युएईको इन्टरनेसनल लिग टी२० मा उनले डिजर्ट भाइपर्स र एमआई इमिरेट्सबाट एक-एक खेल खेलेका छन् । यस्तै उनले स्याम्प आर्मीबाट अबुधाबी टी२० लिग समेत खेलेका छन् । यसैगरी उनले नर्दन सुपरचार्जर्सबा६ इंग्ल्याण्डको दी हन्ड्रेड क्रिकेट पनि खेलेका छन् ।

– यस समाचारको श्रोत : Online Khabar हो ।