सालाहको पेनाल्टी गोलमा लिभरपुल शीर्ष स्थानमा

१३ असोज, काठमाडौं । मोहमद सालाहले दोस्रो हाफमा गरेको पेनाल्टी गोलमा लिभरपुलले प्रिमियर लिगमा वल्भ्सलाई २-१ ले पराजित गर्दै शीर्ष स्थानमा उक्लेको छ ।

वल्भसको मैदान मोनिलक्स स्टेडियममा भएको खेलमा इब्राहिम कोनाटेले पहिलो हाफको इन्जुरी टाइममा गोल गर्दै लिभरपुललाई अग्रता दिलाएका थिए ।

तर, दोस्रो हाफमा वल्भसले बराबरी गोल फर्कायो । ५६औं मिनेटमा अइत नोउरुले वल्भसका लागि बराबरी गोल गरे ।

त्यसपछि सालाहले ६१औं मिनेटमा पेनाल्टीमा गोल गर्दै लिभरपुललाई पुन: अग्रता दिलाए । त्यही गोल नै निर्णायक बन्दा लिभरपुलले ३ अंक जोड्यो ।

जितपछि ६ खेलबाट १४ अंक जोडेको लिभरपुल म्यानचेष्टर सिटीलाई पछि पार्दै शीर्ष स्थानमा उक्लेको छ ।

शनिवार चाँडै भएको खेलमा साविक विजेता सिटी न्युसकाल युनाइटेडसँग १-१ को बराबरीमा रोकिएको थियो । सिटीको ६ खेलबाट १४ अंक छ ।

यस्तै लेस्टर सिटीलाई ४-२ ले पराजित गरेको आर्सनलको पनि समान १४ अंक नै छ । तर, गोल अन्तरमा पछि रहँदै आर्सनल तेस्रो स्थानमा छ ।

यस्तै ब्राइटनलाई ४-२ ले पराजित गरेको चेल्सी ६ खेलबाट १३ अंक जोडेर चौथो स्थानमा उक्लेको छ ।

– यस समाचारको श्रोत : Online Khabar हो ।