सांगीतिक करिअर डेढदशक पुगेको सन्दर्भमा पोखरा र बुटवलमा गुञ्जिँदै कालीप्रसाद
काठमाडौं । संगीतकार तथा गायक कालीप्रसाद बासकोटा सांगीतिक करियर १५ वर्ष पुगेको अवसरमा पोखरा र बुटवलमा गुञ्जिने भएका छन् । नवीन शैलीका गीत गाउन र तयार पार्न रुचाउने उनी ब्यान्डसहित गुञ्जिन लागेका हुन् ।
काली र उनको व्याण्ड साथीभाइले शुक्रबार पोखराको लेकसाइडमा अवस्थित किङ्स लाउन्जमा प्रस्तुति दिने तय भएको छ । त्यहाँ यो ब्यान्डको तेस्रो प्रस्तुति हुनेछ ।
शनिबार बुटवलको द कन्सेप्ट क्लब एण्ड पबमा पनि प्रस्तुति दिने तयारी छ । यी दुबै कन्सर्टमा उनले ‘निर जहिल्यै रिसाउनी’, ‘अजम्बरी लाउँला पिरती’, ‘माया रैछ र भर रैछ नि’ र ‘जीवन जात्रा हो’ लगायतका लोकप्रिय गीत सुनाउनेछन् ।
सुनसरी, झापा, चितवनलगायतका स्थानमा पनि बासकोटाको प्रस्तुतिको तयारी छ । काठमाडौंसहित ललितपुर, मोरङ, सुनसरी, धनकुटा र भोजपुरमा प्रस्तुति दिइसकेका छन् ।
‘यो टुरले मेरो व्यक्तिगत उपलब्धिलाई मात्र उत्सवका रुपमा मनाउँदै छैन, यसले नेपाली संगीतको वृत्ति विकासलाई पनि उजागर गर्नेछ । हाम्रो टुरले फ्यानमाझ पुराना र नयाँ गीत पस्कनेसँगै मेरो यात्रा, करियर, गीत सिर्जनाका अविष्मरणीय क्षणलाई दर्शकमाझ प्रस्तुत गर्नेछ’, बासकोटा भन्छन् ।
नेपाल टुरको व्यवस्थापन पीभीई नेटवर्कले गर्नेछ । नेटवर्कले चार वर्षदेखि काली र उनको व्याण्डको व्यवस्थापन हेर्दै आएको छ । ‘नवीन शैलीका लागि परिचित कालीप्रसादले नेपाली सम्पदाका समृद्ध तत्वहरुसँग समसामयिक ध्वनि मिसाएर नेपाली फिल्मका संगीतलाई पुनः आकार दिएका छन् । उहाँका गीत परिवारदेखि समाज हुँदै राष्ट्र र अन्तर्राष्ट्रिय क्षेत्रमा लोकप्रिय छन् । उहाँको १५ वर्षे करियरको उत्सवमा हातेमालो गर्न पाउँदा हामी उत्साहित छौं’, पीभीई नेटवकका विकेश कायस्थ भन्छन् ।
– यस समाचारको श्रोत : Online Khabar हो ।