संविधानअनुसार बन्न बाँकी कानुनबारे अध्ययन गर्न संसदीय उपसमिति गठन

११ मंसिर, काठमाडौं । राष्ट्रिय सभा अन्तर्गतको विधायन व्यवस्थापन समितिले संविधानअनुसार बन्न बाँकी कानुनहरूबारे अध्ययन गर्न संसदीय उपसमिति गठन गरेको छ ।

मंगलबार बसेको समितिको बैठकले समिति सदस्य बेदुराम भुसालको नेतृत्वमा पाँच सदस्यीय उपसमिति गठन गरेको हो । उपसमितिमा सांसदहरू गंगा कुमारी बेलबासे, गोपाल भट्टराई, मृगेन्द्रकुमार सिंह यादव र विष्णुदेवी पुडासैनी सदस्य छन् ।

उपसमितिलाई एक महिनाको समय दिइएको समिति सभापति तुलसा कुमारी दहालले जानकारी दिइन् । उपसमितिले यसअघि नै समितिले संविधानअनुसार बन्न बाँकी कानुन संसदमा ल्याउन दिएको निर्देशनको कार्यान्वयनको अवस्थासमेत केलाउने छ ।

कुन मन्त्रालयले कति वटा विधेयक ल्याए र कति वटा विधेयक ल्याउन बाँकी छन् भनेर उपसमितिले अध्ययन गर्नेछ । उपसमितिको प्रतिवेदनका आधारमा सम्बन्धित मन्त्रालयसँग छलफल गरिने सभापति दाहालले जानकारी दिइन् ।

– यस समाचारको श्रोत : Online Khabar हो ।