सेन्सर बोर्डले कस्दा रंगेलीका मेयर भने फिल्मको प्रशंसामा
काठमाडौं । पछिल्लो साता फिल्म ‘रंगेली’को सेन्सर अनुभव सुखद् रहेन । छायांकन भएको स्थानीय निकायको सहमति पत्र खोज्दै फिल्मको सेन्सर रोकिएको थियो । तर फिल्मकर्मीको तीव्र विरोधपछि सेन्सर पास भयो ।
यो रस्साकस्सीबीच मोरङको रंगेली नगरपालिकाका मेयरले भने फिल्मले नगरको पर्यटन प्रवर्द्धन गर्ने भन्दै फिल्मको प्रशंसा गरेका छन् । मेयर दिलीपकुमार अग्रवाल (बगडिया)ले सामाजिक सञ्जालमा भिडियो पोस्ट गर्दै आफ्नो नगरपालिकाको नाममा फिल्म बनेकोमा खुसी व्यक्त गरेका हुन् ।
ऐतिहासिक, धार्मिक तथा सांस्कृतिक दृष्टिकोणबाट नगरपालिकाको प्रचुर सम्भावना रहेको बताउँदै मेयर अग्रवालले फिल्मको व्यावसायिक सफलताको कामना गरेका छन् । उनले फिल्ममार्फत नगरलाई चिनाउने काम गरेको भन्दै धन्यवाद समेत दिएका छन् ।
फागुन २५ गते प्रदर्शन तयारीमा रहेको यो फिल्मलाई अर्जुन सुवेदीले निर्देशन गरेका हुन् । ‘रंगेली’को सेटिङमा खिचिएको यो फिल्मले स्थानीय पात्र पत्नी र परिवारको खुसीका लागि कसरी ग्याङ्स्टर बन्न बाध्य हुन्छ भन्ने कथा पेश गरेको छ । फिल्मले सेन्सर बोर्डबाट पीजी सर्टिफिकेट प्राप्त गरेको छ ।
फिल्ममा दयाहाङ राई, अर्पण थापा, मिरुना मगर, अर्पण थापा, प्रवीण खतिवडा, रमेश बुढाथोकी, रुपेश झा, सुन्दर धिताल लगायतको अभिनय छ । कार्यकारी निर्माता जितेन्द्र खतिवडा र अनुज थापा हुन् । संसार चौलागाईं र रमेश भट्टराई वरिष्ठ निर्माता हुन् भने युवक कार्की र शिवशंकर चौलागाईं सहनिर्माता हुन् ।
– यस समाचारको श्रोत : Online Khabar हो ।