स्पेस स्टेशनबाटै राष्ट्रपति चुनावमा भोट हाल्दैछन् यी अन्तरिक्षयात्री

काठमाडौं। अमेरिकामा आगामी नोभेम्बर महिनामा राष्ट्रपति पदको चुनाव हुँदैछ । यो दौडमा रिपब्लिकन उम्मेदवार डोनाल्ड ट्रम्प र डेमोक्रेटिक उम्मेदवार कमला ह्यारिस प्रतिस्पर्धा गर्दैछन् । यो पटकको अमेरिकी चुनावमा अमेरिकी अन्तरीक्षयात्री सुनिता विलियम्स र बुच विलमोरसहित कूल ७ जना अमेरिकी अन्तरिक्षयात्रीले एक नयाँ इतिहास रच्दैछन् ।

हाल स्पेस स्टेशनमा रहेका उनीहरुले अमेरिकी राष्ट्रपति चुनावमा अन्तरीक्षबाटै मतदान गर्नेछन् । स्पेस स्टेशनबाट यतिधेरै अन्तरीक्षयात्रीले एकैपटक अमेरिकी राष्ट्रपति चुनावमा मतदान गर्ने यो पहिलो घटना हुनेछ । पृथ्वीभन्दा करिब ४ सय किलोमिटर टाढाबाट मतदान गरेर उनीहरुले इतिहास रच्नेछन् ।

सन् १९९७ मा सुरु भएको प्रक्रिया

अमेरिकामा अन्तरिक्ष स्टेशनमा रहेका अमेरिकी अन्तरिक्षयात्रीहरुले समेत मतदान गर्न पाउने व्यवस्था सन् १९९७ बाट सुरु भएको थियो । टेक्सासमा एक विधयेक पारित गरी नासाका अन्तरीक्षयात्रीहरुलाई अन्तरीक्षबाटै भोट हाल्ने अधिकार दिइएको थियो ।

उक्त कानून अनुसार यदि कोही अमेरिकी नागरिक अन्तरिक्षमा छ भने उसले विद्युतीय माध्यमबाट मतदान गर्न सक्दछ । नासाका धेरै अन्तरिक्षयात्रीहरु टेक्ससको ह्युस्टनका बासिन्दा भएको हुनाले यस्तो टेक्सास राज्यले यस्तो कानून बनाएको थियो ।

सुनिताले अन्तरिक्षबाट मतदान गर्नको लागि एउटा निश्चित प्रक्रियाको पालना गर्नुपर्नेछ । उनले सबैभन्दा पहिले संघीय पोस्टकार्ड आवेदन भरेर अनुपस्थित मतदाता मतपत्र -(Absentee ballot) का लागि अनुरोध गर्नु पर्नेछ ।

यसको अर्थ अन्तरिक्ष यात्रीले आफूले भाग लिने चुनावका लागि आवेदन गर्नुपर्नेछ । त्यसपछि नासाको मिसन कन्ट्रोल सेन्टरबाट एउटा सुरक्षित विद्युतीय मतपत्र अन्तरिक्षमा पठाइन्छ । त्यसपछि अन्तरीक्षयात्रीले स्पेस स्टेशनको कम्प्युटर सिस्टममा मतदान गर्न सक्दछन् ।

स्मरण रहोस् डेभिड उल्फले पहिलो पटक अमेरिकी चुनावमा अन्तरीक्षबाट मतदान गरेका थिए । त्यसपछि अरु केही अन्तरिक्षयात्रीहरुले स्पेस स्टेशनबाटै मतदान गरिसकेका छन् ।

अन्तरिक्षबाटै मतदान गर्न पाउँदा निकै उत्साहित भएको भन्दै सुनिता र विलमोरले त्यसका लागि आवेदन गरिसकेको बताएका छन् । हाल स्पेस स्टेशनमा अमेरिकाका ७ जना अन्तरीक्षयात्री रहेका छन् । एजेन्सीको सहयोगमा

– यस समाचारको श्रोत : Online Khabar हो ।