अमेरिकामा श्रीमती बोक्ने प्रतियोगिता, श्रीमतीकै तौल बराबर बियर पुरस्कार
अमेरिकामा हालै सम्पन्न नर्थ अमेरिकन वाइफ क्यारिंग च्याम्पियनशिपमा ३० भन्दा धेरै जोडीहरु सहभागी भए ।
ठूलो संख्याका दर्शकका बीच सम्पन्न उक्त श्रीमती बोक्ने प्रतियोगितामा प्रतिस्पर्धीहरु पानीमा चोपलिंदै, काठका मुढा नाघ्ददै, हिलो कुल्चिँदै दौडिए । त्यसो गरिरहँदा पुरुष प्रतियोगीहरुले आफ्नी पत्नीलाई आलुको बोरा जस्तै गरी काँधमा बोकिरहेका थिए ।
यो प्रतियोगिता १९औं सताब्दीको एक चर्चित लुटेराको शैलीबाट प्रभावित भएर सुरु गरिएको हो । रोन्केइनेन द रबर नामक फिनल्याण्डको लुटेराले गाउँहरुमा गएर लुटपाट गर्ने र त्यहाँका महिलाहरुलाई उठाएर लैजाने गर्दथ्यो ।
त्यही शैलीमा यो प्रतियोगितामा सहभागी जोडीमध्ये पुरुषले आफ्नो पार्टनरलाई काँधमा बोकेर दौडिन्छन् ।
यद्यपि शनिबार आयोजित प्रतियोगितामा भने केवल विवाहित जोडी अर्थात् महिला र पुरुष मात्रै सहभागी भएनन् । केही जोडी बोक्ने र बोकिनेहरु दुवै पुरुषहरू वा महिलाहरु मात्रै समेत थिए ।
अमेरिकाको मेइनमा रहेको सन्डे रिभर स्की रिसोर्टस्थित २ सय ५४ मिटरको मार्गमा उक्त प्रतिस्पर्धा भएको थियो ।
उक्त प्रतियोगितामा विजेता हुनेले पुरस्कार स्वरुप ‘श्रीमती’ को तौल बराबरको बियर तथा तौलको अंकको पाँच गुणा बराबरको नगद रकम प्राप्त गरे ।
त्यसक्रममा विजेताकी पत्नीलाई तराजुमा राखेर तौल लिइएको थियो । तराजुको एकापट्टि पत्नी र अर्कोपट्टि बियरका कार्टुन राखेर बराबर तौल बनाएर दिइएको थियो ।
– यस समाचारको श्रोत : Online Khabar हो ।