हङकङमा ‘गाउँ आएको बाटो’को विषेश प्रदर्शन

काठमाडौं । फिल्म ‘गाउँ आएको बाटो’को हङकङमा विषेश प्रदर्शन सम्पन्न भएको छ । स्थानीय गोल्डेन सिन सिनेमाको हलमा आइतबार १२ शोमा बाँडेर फिल्म देखाइएको हो ।

प्रदर्शनमा निर्देशक नवीन सुब्बा, कलाकार पशुपति राई, प्रसन राई लगायत सहभागि रहे । स्क्रिनिङमा हङकङस्थित नेपाली महावाणिज्यदूत उदयबहादुर राना, हङकङ नेपाली महासंघकी अध्यक्ष रीता गुरुङ, हङकङ किरात राई यायोक्खाका प्रतिनिधि, कलाकार, साहित्यकार तथा नेपाली संघसंस्थाका प्रतिनिधि सहभागि थिए ।

निर्देशक सुब्बाले चलचित्र हेरेपछि हङकङका नेपाली दर्शकसँग साक्षत्कार पनि गरेका थिए । उनले आफ्नो फिल्मकर्मको सुरुवाती दिनदेखि हङकङबासी नेपाली समुदायले सहयोग गर्दै आएको बताए ।

त्यहाँस्थित देवराज राई, अरुण राई, मातृदीप राई, रामली राई, सुमन बोनेम, मायादेवी राईलगायत जोडबलले यो प्रदर्शन सफल भएको उनले बताए । उनले चलचित्र हेर्न आएकोमा नेपाली समुदायलाई धन्यवाद समेत व्यक्त गरे ।

निर्माता अमोद राईले हङकङको गोल्डेन सिनको सुविधायुक्त हलमा फिल्मको विशेष प्रदर्शन सम्पन्न भएको बताए । फिल्म हेर्न ८ सय दर्शक उपस्थित थिए ।

‘हामीले लामो समयदेखि देखेको यो सपना ऐतिहासिक रुपमा गोल्डेन सिन सिनेमाको हलमा भव्यताका साथ सम्पन्न भयो । नेपाली दर्शकको उपस्थिति हामीले सोचेको भन्दा उल्लेख्य रह्यो । हामीले पहिलो पटक हङकङको सुविधा सम्पन्न हलमा देखाउन सफल भयौँ । हामीलाई आगमी दिनमा काम गर्ने थप ऊर्जा मिलेको छ’, उनले भने ।

फिल्मलाई अक्टोबर २८ मा चिनियाँ दर्शकमाझ सार्वजनिक प्रदर्शनको तयारी छ । चिनियाँ दर्शकलाई लक्षित गरी पहिलोपटक नेपाली फिल्मलाई प्रदर्शन गर्न लागिएको जनाइएको छ ।

फिल्मलाई थाइल्यान्ड, इन्डोनेसिया, इटाली र बेलायतमा समेत प्रदर्शनको तयारी छ । यसअघि क्यानडाको टोरोन्टो, दक्षिण कोरियाको बुसान, ब्राजिलको साओ पाउलो, भारतको मुम्बई, स्विडेनको गोटेबर्ग, चीनको बेइजिङलगायत महोत्सवमा प्रदर्शन गरिएको थियो ।

– यस समाचारको श्रोत : Online Khabar हो ।