ओलम्पिकमा यस्ता रेकर्ड, जो कहिल्यै नतोडिन पनि सक्छन् !

१४ साउन, काठमाडौं । भनिन्छ-कीर्तिमानहरु तोडिनकै लागि बन्दछन् । कुनै खेलाडीले उत्कृष्ट प्रदर्शन गरेमा अन्तत: अर्कोले आएर त्योभन्दा राम्रो प्रदर्शन पनि गर्न सक्छ ।

तर विश्व खेलकुदको कुम्भ मेला ओलम्पिकमा केही त्यस्ता कीर्तिमानहरु छन्, जुन अहिलेसम्म तोडिएका छैनन् । भविष्यमा तोडिन पनि सक्छ, नतोडिन पनि सक्छ !

हाल फ्रान्समा जारी पेरिस ओलम्पिकमा पनि केही कीर्तिमानहरु बन्दैछन् । तर ओलम्पिकका केही यस्ता कीर्तिमानहरु पनि छन् जुन तोडिने सम्भावना एकदमै न्यून छ वा शून्य नै छ ।

यस्ता केही ओलम्पिक कीर्तिमानहरु छन्, जुन सम्भवत: नतोडिन पनि सक्छ ।

सय मिटरमा बोल्टको कीर्तिमान

जमैकन स्प्रिन्टर उसेन बोल्टले तीन पटक ओलम्पिकमा १०० मिटरमा लगातार स्वर्ण जिते । जुन आफैंमा कीर्तिमान हो ।

त्यसमा पनि सन् २०१२ को लण्डन ओलम्पिकमा उनले कीर्तिमान ९.६३ सेकेण्डमा सय मिटर दूरी दौडेका थिए । त्यसअघि कसैले पनि त्यो समयमा दौड पूरा गर्न सकेको थिएन । बोल्टले सन् २००८ को बेइजिङ ओलम्पिकमा आफैंले राखेको ९.६९ सेकेण्डको कीर्तिमान तोडेका थिए ।

बोल्टले १०० मिटरमा विश्व कीर्तिमान पनि राखेका छन् । सन् २००९ मा बर्लिनमा भएको वर्ल्ड च्याम्पियनसिपमा उनले सय मिटर दूरी ९.५८ सेकेण्डमा पूरा गर्दै कीर्तिमान बनाएका थिए । बोल्टले १०० मिटरमा ओलम्पिकका शीर्ष दुई समय आफ्नो नाममा लाएका छन् भने विश्व कीर्तिमान पनि बनाए । जुन कीर्तिमान कहिल्यै नतोडिन सक्छ । उनले २०० मिटरमा पनि ओलम्पिक र विश्व कीर्तिमान दुवै बनाएका थिए ।

जिम्न्यास्टिकमा नादियाको १० मा १० अंक

रोमानिया जिम्न्यास्ट नादिया कोमानेसीले ओलम्पिकमा पाँच स्वर्ण पदक जितेकी छन् । सन् १९७६ मा को मोन्ट्रेल ओलम्पिकमा १४ वर्षीय नादियाले १० मा १० अंक पाएकी थिइन् । यस्तो उपलब्धी हासिल गर्ने उनी पहिलो जिम्न्यास्ट हुन् ।

यस्तो सफलता विरलै हुने भएकोले मोन्ट्रेलको डिसप्ले बोर्डमा १.०० देखाइएको थियो किनभने उनीहरु १०.० स्वीकार गर्न तयार थिएनन् । इन्टरनेशनल जिम्न्यास्ट फेडेरेसनले सन् २००६ मा पर्फेक्ट १० लाई हटाएर स्कोरिङ सिस्टमा १०.० राखेको थियो ।

अमेरिकन जिम्न्यास्ट म्यारी लोउ रेटोनले सन् १९८४ को लस एन्जलस ओलम्पिकमा फ्लोर एक्सरसाइजमा परफेक्स १० स्कोर गरेका थिए । तर कोमानेसीले १० अंक स्कोर गर्ने पहिलो जिम्न्यास भनेर सधैँ चिनिन्छिन् ।

कान्छो स्वर्ण विजेता

सन् १९९४ को लिलेहामर विन्टर ओलम्पिकमा दक्षिण कोरियाका स्पिड स्केटर किम युन मिले महिला ३ हजार मिटर लेमा स्वर्ण पदक जितिन् । जतिबेला उनको उमेर १३ वर्ष ८६ दिन मात्र थियो ।

ओलम्पिक इतिहासमा किम युनको नाममा सबैभन्दा कान्छो उमेरमा स्वर्ण जित्ने कीर्तिमान छ । जुन कीर्तिमान तोडिन कठिन छ ।

अन्तर्राष्ट्रिय ओलम्पिक कमिटी (आईओसी) ले ओलम्पिक प्रतिस्पर्धामा कुनै उमेर हदवन्दी तोकेको छैन । तर हरेक इन्टरनेसनल स्पोर्ट्स फेडेरेसनले भने उमेरका लागि आफ्नै मापदण्ड बनाएको छ । किम युनको कीर्तिमान स्वर्ण पदक पछि इन्टरनेशनल स्केटिङ युनियनले कम्तीमा १५ वर्षको उमेर हद राखेको छ ।

१० ओलम्पिकमा सहभागी इयान मिलर

क्यानडाका इक्वेस्ट्रिन खेलाडी इयान मिलरले ४० वर्षको अवधि (१९७२-२०१२) मा १० ओलम्पिकमा सहभागिता जनाउँदै कीर्तिमान बनाएका थिए । जुन ओलम्पिक इतिहासमा अन्य कुनै पनि खेलाडीको भन्दा धेरै हो ।

अष्ट्रियन सेलर हुबर्ट राउडासल, लात्भियाका सुटर अफानासिज कुजमिन्स र पूर्व सोभियन युनियका सुटर निनो सालुकभाड्ज मिलरको नजिक छन् । उनीहरुले ८ पटक ओलम्पिकमा सहभागिता जनाए । तर दुर्भाग्यवश ती कोही पनि अहिले प्रतिस्पर्धीका रुपमा ओलम्पिकमा छैनन् ।

यद्यपि मिलरले १० पटक ओलम्पिक खेल्दा कहिले पनि स्वर्ण पदक जित्न सकेनन् । उनले एक मात्र ओलम्पिक मेडल सन् २००८ को बेइजिङ ओलम्पिकमा रजत पदक जितेका थिए ।

टेबलटेनिसका चिनको दबदबा

सन् १९८८ को सोल ओलम्पिबाट टेबलटेनिसले ओलम्पिकमा डेब्यु गरेको थियो । त्यसयता चिनले यस खेलमा सम्भव भएको ३७ मध्ये ३२ स्वर्ण पदक जितेको थियो । चिनको नजिक रहेको दक्षिण कोरियाले ३ तथा जापान र स्विडेनले एक एक स्वर्ण जिते ।

टेबल टेनिसमा चीनले एकछत्र राज जमाएको थियो । किनकी चीनले २० रजत र ८ कांस्य पनि जितेको थियो । यस्तो प्रभुत्व कुनै पनि खेलमा फेरि देख्न असम्भव जस्तै छ ।

एलादार गेरेभिचको लगातार ६ स्वर्ण

हंगेरियन फेन्सिङ खेलाडी अलादार गेरेभिचले २४ वर्ष एक छत्र राज गर्दा कसैले चुनौती दिन सकेनन् । उनले सन् १९३२ देखि १९६० सम्म ओलम्पिकमा लगातार स्वर्ण पदक जिते । यस अवधिमा दोस्रो विश्वयुद्धले गर्दा दुई संस्करणको ओलम्पिक रद्ध भएको थियो ।

गेरेभिभको सीप, दृढता, स्थिरता र दीर्घायुले उनलाई सर्वकालीन महान फेन्सरको रुपमा चिनियो । उनको नजिक पुगेका सेवानिवृत्त ब्रिटिश रोवर सर स्टिभ रेडग्रेभले सन् १९८४ देखि २००० सम्म लगातार पाँच ओलम्पिक स्वर्ण पदक जितेका थिए ।

१९०४ को ओलम्पिकमा अमेरिकाको २३९ पदक

अमेरिकाले सन् २०१६ को रियव ओलम्पिकमा इतिहास बनायो । सन् १८९६ मा आधुनिक ओलम्पिक सुरु भएयता अमेरिका एक हजार स्वर्ण पदक जित्ने पहिलो राष्ट्र बन्यो । पेरिस ओलम्पिकमा आउनुअघिसम्म अमेरिकाले कूल १ हजार १८३ स्वर्ण र २ हजार ९८५ पदक जितिसकेको छ ।

उसको नजिक रहेको सोभियन युनियर र रसियन फेडेरेसन जोड्दा ४७३ स्वर्ण जितेको छ भने समग्रमा १ हजार २०४ स्वर्ण छ ।

यस्तै एकै ओलम्पिक अमेरिकाले जितेको पदकको संख्या ब्रेक गर्न कठिन जस्तै छ । अमेरिकाले सन् १९०४ को सेन्ट लुइस ओलम्पिकमा ७८ स्वर्ण, ८२ रजत र ७९ कांस्य गरी कूल २३९ पदक जितेको थियो । अमेरिकाले त्यस संस्करणमा उपलब्ध भएका मध्ये ८५ प्रतिशत पदक जितेको थियो ।

माइकल फेल्प्सको २३ स्वर्ण र २८ पदक

अमेरिकन पौडीबाट माइकल फेल्प्सले आफ्नो ओलम्पिक करियरमा २३ स्वर्ण पदक जिते । उनले अन्तिम पटक २०१६ को रियो ओलम्पिकमा प्रतिस्पर्धा गरेका थिए ।

फेल्प्सले सन् २००८ को बेइजिङ ओलम्पिकमा एकै संस्करणमा ८ स्वर्ण जित्ने पौडीबाजको कीर्तिमान बनाएका थिए । फेल्प्सले आफूले ओलम्पिकमा सहभागिता जनाएको इभेन्ट मध्ये ८० प्रतिशतभन्दा बढी इभेन्ट जितेका छन् ।

यस्तै उनले ओलम्पिक करियरमा २८ पदक जितेका छन् । जुन अर्को कीर्तिमान हो । फेल्प्सअघि सोभियत युनियनका जिम्न्यास्ट रिसा लातिनिनाले सन् १९५६ देखि १९६४ सम्म ९ स्वर्णसहित १८ पदक जितेका थिए ।

फेल्प्सको वर्चस्व अतुलनीय छ र सम्भवतः कुनै पनि अन्य ओलम्पियनबाट यो कीर्तिमान तोडिन सक्ने छैन ।

इएसपीएन डट इनबाट भावानुवाद

– यस समाचारको श्रोत : Online Khabar हो ।