विधानसभा निर्वाचन : अरुणाचलमा भाजपालाई बहुमत, सिक्किममा पूर्वमुख्यमन्त्री पवन चाम्लिङ पराजित
२० जेठ, काठमाडौं । भारतको अरुणाचल प्रदेश र सिक्किममा विधान सभा निर्वाचनको मतगणना जारी छ ।
प्रारम्भिक नतिजामा अरुणाचल प्रदेशमा भाजपाले बहुमत सिट जितेको छ । सिक्किममा सत्तारुढ सिक्किम क्रान्तिकारी मोर्चा (एसकेएम)ले जितेको छ । अरुणाचल र सिक्किम दुवैमा कांग्रेसले खाता खोल्न सकेको छैन ।
अरुणाचलका ६० र सिक्किमका ३२ सिट विधानसभाका लागि १९ अप्रिलमा एकै चरणमा निर्वाचन भएको थियो ।
भारतीय मिडियाहरुका अनुसार अरुणाचलमा भाजपाले २८ सिट जितिसकेको छ भने १७ सिटमा अगाडि छ । १० सिटमा भाजपाका उम्मेदवार निर्विरोध निर्वाचित भइसकेका छन् ।
सिक्किम क्रान्तिकारी मोर्चाले १६ सिट जितिसकेको छ भने १५ सिटमा अगाडि छ । सिक्किम डेमोक्रेटिक फ्रन्ट (एसडीएफ)ले एक सिट जितेको छ ।
सन् २०१९ मा अरुणाचलमा भाजपाले ४२ सिट जितेर सरकार बनाएको थियो ।
यसैगरी सिक्किममा ३२ सिटमध्ये १७ सिटसहित सिक्किम क्रान्तिकारी मोर्चाले सरकार बनाएको थियो ।
प्रेम सिंह तामाङ (पीएस गोले) मुख्यमन्त्री बनेका थिए । यसपटकको निर्वाचनमा पनि उनी विजयी भइसकेका छन् ।
पूर्वमुख्यमन्त्री पवन चाम्लिङ पराजित
सिक्किमका पूर्वमुख्यमन्त्री एवम् सिक्किम डेमोक्रेटिक फ्रन्ट (एसडीएफ)का उम्मेदवार पवन कुमार चाम्लिङ दुवै सिटमा हारेका छन् । उनी नामचेयबुङ्ग र पोकलोक–कामराङ्ग क्षेत्रबाट चुनाव लडेका थिए ।
उनी नामचेयबुङ्ग क्षेत्रबाट २ हजार २५६ मत र पोकलोक–कामराङ्ग क्षेत्रबाट ३ हजार ६३ मतले पराजित भएको भारतीय मिडियाहरुले उल्लेख गरेका छन् ।
सन् २०१९ को आम चुनावपछि सिक्किम क्रान्तिकारी मोर्चा र भाजपाबीच गठबन्धन भएको थियो । तर यसपटक भाजपा एक्लै चुनाव लडेको छ ।
– यस समाचारको श्रोत : Online Khabar हो ।