१३ विधामा नेसनल म्युजिक अवार्ड दिइने, इण्डियन आइडल पवनदीपले प्रस्तुति दिंदै
काठमाडौं । रेडियो कान्तिपुरको आयोजनामा ‘नेसनल म्युजिक अवार्ड’को छैटौं संस्करण आयोजना हुने भएको छ । काठमाडौंमा आयोजित पत्रकार सम्मेलनमा जेठ ३२ गते समारोह हुने जानकारी दिइयो ।
१३ विधामा अवार्ड वितरण गरिने भएको छ । पत्रकार सम्मेलनमा ती विधामा उत्कृष्ट पाँच मनोनयन सार्वजनिक गर्दै ‘दीर्घ साधना सम्मान’ (लाइफ टाइम अचिभमेन्ट)तर्फ नेपाली संगीतमा आफ्नो जीवन अर्पण गर्ने स्रष्टालाई १ लाख नगदसहित सम्मान गरिने जनाइएको छ ।
मनोनयनमा परेका शीर्ष पाँचमध्येबाट तीन सदस्यीय निर्णायकद्वारा विजेताको छनोट गरिने भएको छ । २०७९ साउनदेखि २०८० असार मसान्तसम्म प्रसारण भएका गीतबाट शीर्ष पाँचको मनोनयन सार्वजनिक गरिएको हो ।
यसपटक पनि ‘नवगायक/नवगायिका’, रचनाकार, संगीतकार, लोकदोहोरी गायक/गायिका, उत्कृष्ट पार्श्वगायक/गायिका, आधुनिक/पप गायक, आधुनिक/पप गायिका, सांगीतिक समूह र पिपुल्स च्वाइस अवार्ड विधामा अवार्ड प्रदान गरिनेछ ।
पिपुल्स च्वाइस अवार्डको विजेता भने भोटिङमार्फत छनोट गरिने भएको छ । अवार्ड समारोहमा इण्डियन आइडलको १२ औं सिजनका विजेता पवनदीप राजन र उनको समूहले प्रस्तुति दिने भएको छ । नेपालका चर्चित गायक-गायिकाले पनि उक्त समारोहमा प्रस्तुति दिनेछन् । अघिल्लो वर्ष भारतीय गायक सलमान अलीले प्रस्तुति दिएका थिए ।
पत्रकार सम्मेलनमा कान्तिपुर मिडिया ग्रुपका चिफ अफ स्टाफ तथा प्रमुख कार्यकारी अधिकृत शिशिर पछाईंले नेपाली सांगीतिक क्षेत्रमा यो अवार्डलाई बृहत र परिस्कृत बनाउँदै लैजाने भन्दै रेडियो कान्तिपुरले स्थापनाको २५ वर्षसम्ममा पनि स्रष्टालाई रोयल्टी प्रदान गर्दै आएर उदाहरण बनेको बताए ।
– यस समाचारको श्रोत : Online Khabar हो ।