शिक्षक दरबन्दी कटौती गरेको विरोधमा भीमसेन थापा गाउँपालिकामा ताला

१६ भदौ, गोरखा । विद्यालयमा शिक्षक दरबन्दी कटौती गरेको विरोधमा भीमसेन थापा गाउँपालिकाको कार्यालयमा तालाबन्दी गरिएको छ ।

भीमसेन थापा- १, मसेलस्थित दुल्लभ माध्यमिक विद्यालयको हाल भइरहेको विज्ञान विषयको मावि दरबन्दी कटौती गरेको भन्दै आइतबार अभिभावकहरुले तालाबन्दी गरेका हुन् ।

उक्त दरबन्दीमा रही विद्यालयका सहायक प्रधानाध्यापक राजु नेपालीले विज्ञान विषय पढाउँदै आएका थिए । विद्यालयको आवश्यकता नबुझी पालिकाले मनपरी ढंगले दरबन्दी कटौती गरेका कारण तालाबन्दी गर्नुपरेको विद्यालय व्यवस्थापन समिति अध्यक्ष रोशन गुरुङले बताए ।

‘विद्यालयमा विज्ञान विषय पढाउने जम्मा दुई शिक्षक मात्र हुनुहुन्छ, फेरि विद्यालयमा जम्मा दुई वटा मावि दरवन्दी छ,’ उनले भने, ‘विद्यालयको आवश्यकता नबुझी त्यही जनशक्ति पनि कट्टा गरेपछि समस्या भयो ।’

विद्यार्थी र अभिभावकहरुको चाहनालाई समेत मध्यनजर गरी पालिकालाई दरबन्दी कटौती नगर्न भन्दै पटक पटक पत्राचार गरेपनि बेवास्ता गरेपछि विरोधमा उत्रिन बाध्य भएको उनले जानकारी दिए ।

विद्यालय प्रशासन र व्यवस्थापन समितिलाई समेत खबर नगरी दरबन्दी कटौती गरेको भन्दै उनले भने, ‘पालिकाको यो काम नियमसम्मत् छैन, हाम्रो पटक पटकको मागलाई नजरअन्दाज गरिएको छ ।’

यही विषयमा छलफल गर्न आइतबार पालिकाको कार्यालय जाँदा अध्यक्ष, उपाध्यक्ष र कार्यकारी लगायत अन्य कोही उपस्थित नभएपछि बाध्यताले तालाबन्दी गर्नुपरेको गुरुङले जिकिर गरे । पालिका शिक्षा शाखा प्रमुख यानबहादुर नेपालीले यस विषयमा छलफल भइरहेको बताए ।

छलफलका लागि आफूहरु तयार रहेको भन्दै उनले अभिभावकहरुको माग सम्बोधन हुने बताए ।

– यस समाचारको श्रोत : Online Khabar हो ।