ग्रीनकार्डको कथावस्तुमा वेब सिरिज ‘मोड’ बन्ने
काठमाडौं । किरण माइकल घिमिरेको लेखन निर्देशनमा वेब सिरिज ‘मोड’ बन्ने भएको छ । सम्पूर्ण छायांकन अस्ट्रेलियामा हुने सिरिजको अहिले प्रि-प्रोडक्सनको कार्य भइरहेको छ ।
दुई दशक लामो समय सांगीतिक करिअर र फिल्मी क्षेत्रमा खर्चिएका घिमिरे अहिले अस्ट्रेलियामा छन् । यो बीचमा उनले दर्जन बढी नेपाली फिल्मको कथा लेखनको काम गरिसकेका छन् । सोही अनुभवलाई लिएर ‘वेब सिरिज’ निर्माण निर्देशनमा जुटेको घिमिरेले बताए ।
‘मोड’ नाम दिइएको सिरिजमा वैदेशिक ग्रिनकार्ड, प्रेम र विवाहसम्मको कथावस्तु समावेश हुने जनाइएको छ । यो सिरिज आध्या प्रोडक्सन अस्ट्रेलियाको ब्यानरमा तयार हुनेछ । नौ एपिसियोडमा तयार हुने सिरिजमा १२ वटा ओएसटी समावेश हुने घिमिरेले बताएका छन् ।
सेप्टेम्बर दोस्रो सातादेखि छायांकनमा जाने सिरिजमा अहिलेसम्म आकाश पल, अभी सुनार, पवित्रा केसी र रमेश सेन्चुरी प्रमुख कलाकारमा फाइनल हुँदा अन्य कलाकारहरूको अस्ट्रेलियामै खोजी भइरहेको निर्माण टिमले बताएको छ । ओटीटी प्लाटफर्ममा रिलिज गरिने यो सिरिजलाई अर्को वर्ष दर्शकमाझ ल्याउने बताइएको छ ।
– यस समाचारको श्रोत : Online Khabar हो ।