१ हजार राजस्व संकलन गर्न ३ रुपैयाँ ८४ पैसा खर्च

६ मंसिर, काठमाडौं । नेपालको आन्तरिक राजस्व संकलन लागत वृद्धि भएको छ । लक्ष्यको तुलनामा राजस्व संकलन कम हुनु र चालु खर्च बढ्दा राजस्व संकलन लागत बढ्न पुगेको छ ।

पछिल्लो दुई आर्थिक वर्षयता लागत क्रमशः उकालो लागेको आन्तरिक राजस्व विभागको तथ्यांकमा देखिन्छ । विभागले आर्थिक वर्ष २०८०/८१ मा ५ खर्ब ३३ अर्ब ३ करोड राजस्व संकलन गरेको छ ।

गत आव विभाग र मातहत कार्यालयले २ अर्ब ५ करोड रुपैयाँ खर्च गरेका छन् । कुल राजस्व संकलनलाई खर्च भाग लगाउँदा १ हजार संकलन गर्न ३.८४ रुपैयाँ लागत पुगेको आन्तरिक राजस्व विभागले जनाएको छ ।

यस्तो लागत पछिल्ला वर्ष बढ्दो क्रममा देखिन्छ । विभागका अनुसार २०७९/८० मा १ हजार राजस्व संकलन लागत ३.३८ रुपैयाँ परेको थियो । उक्त आवमा विभागले ४ खर्ब ७९ अर्ब ७९ करोड राजस्व उठाएको थियो । खर्च भने १ अर्ब ४१ करोडमात्र थियो ।

विभागको चालु तथा पूँजीगत खर्च २०७८/७९ मा धेरै थियो । उक्त वर्ष विभागले २ अर्ब १७ करोड खर्च गरेको थियो । राजस्व संकलन भने ४ खर्ब ८३ अर्ब थियो । त्यसबेला १ हजार राजस्व संकलनको लागत २.२३ रुपैयाँ थियो ।

आन्तरिक राजस्व विभागले एक ठूला करदाता कार्यालय, एक मध्यमस्तरीय कार्यालय, ४३ आन्तरिक राजस्व कार्यालय र ३९ करदाता सेवा कार्यालयबाट राजस्व संकलन गर्दै आएको छ । देशभरि विभागका ८४ कार्यालय सञ्चालनमा छन् ।

विभागले २०८०/८१ मा ६ खर्ब ७७ अर्ब ७३ करोड रुपैयाँ राजस्व संकलन लक्ष्य राखेकोमा लक्ष्यको ७८.६५ प्रतिशत अर्थात् ५ खर्ब ३३ अर्ब रुपैयाँ राजस्व संकलन गरेको हो ।

– यस समाचारको श्रोत : Online Khabar हो ।