२५ वर्षीय छोरो गुमाएका रामपरी र रामउदगारलाई ऋणको गलपासो

७ मंसिर, जनकपुरधाम । धनुषाको बटेश्वर गाउँपालिका–१, सोनापुरकी ६५ वर्षीया रामपरी देवी महतोले २५ वर्षीय छोरा गुमाइन् । घर बनाउने काममा खटिएकै बेला एक्कासी बेहोस भएर ढलेपछि ऋण काढेर अस्पताल पुर्‍याइएको छोरा लालबाबुलाई गुमाएयता उनको आँखा ओभानो हुन सकेको छैन ।

आफू प्यारालाइसिसबाट पीडित रामपरीको जेठो छोरा प्रदीप अशक्त छन् । श्रीमान् रामउदगार पनि बेला बेला बिरामी परिरहन्छन् ।

अघिल्लो वर्ष फागुनमा मात्रै लालबाबु वैदेशिक रोजगारबाट फर्किएका थिए । उनी आएदेखि नै परिवारमा खुसीको छुट्टै माहोल थियो ।

उनी आएपछि बिहेको कुरा चल्यो । परिवारकै सरसल्लाहमा लालबाबुले गत जेठमा २८ गते धुमधामसित बिहे गरेयता झनै खुसी थपिएको थियो ।

रामपरी र रामउदगारलाई लाग्यो, ‘अब दुःखका दिन दूर भयो ।’ लालबाबु पनि विदेश नफर्कने सोचमा पुगे । गाउँमै मजदुरी गर्न थालेपछि परिवारको दैनिक सहजै चलिरहेको थियो ।

तर, यो परिवारको खुसी लामो टिक्न सकेन ।

साउन तेस्रो साता लालबाबु मजदुरी गरिरहेकै बेलामा अचानक बेहोस भए । तत्काल जानकी मेडिकल कलेज शिक्षण अस्पताल रमदैयामा भर्ना गरियो ।

चिकित्सकीय रिपोर्टका अनुसार लालबाबुमा मस्तिष्कघात देखियो । सोच्दै नसोचेको रिपोर्ट चिकित्सकले सुनाएपछि परिवार आत्तियो । उनको उपचारको लागि उनीहरूसँग पर्याप्त रकम थिएन ।

तर छोरोको जीवन बचाउन ऋणधन गरेर थप उपचारको जोहो गरे । मुटुको धड्कन चलिरहेकै थियो । भेन्टिलेटरसहितको एम्बुलेन्स रिजर्भ गरेर लालबाबुलाई काठमाडौं ल्याइयो ।

तर, लालबाबुलाई परिवारले बचाउन सकेन । गत २३ साउनमा काठमाडौंस्थित अन्नपूर्ण न्यूरो अस्पतालले उनलाई मृत घोषणा गरिदियो ।

परिवारको मुख्य खम्बा लालबाबु अस्ताएसँगै परिवार अहिले ऋणको भार थेग्न नसकेर पीडामा छ । परिवारको आशाभरोसा बनेको छोरा गुमाएको शोकसँगै ऋणको भार थपिएको छ ।

विपन्न परिवारकै बुहारी भित्र्याएका महतो परिवारले उनको निवाहका लागि तीन लाख दिनुपर्ने निर्णय समाजले गरिदियो र उक्त रकम भुक्तानी गर्न तीन महिनाको समयसीमा तोकिदियो ।

सँगसँगै, घरघडेरी जोड्दा लागेको १२ लाख ऋण तिर्न बाँकी छँदैछ ।

बल्लतल्ल खुसी बटुल्न थालेको परिवारमा परेको यो बज्रपातले परिवारमा बेचैनी थपेको छ । ‘कमाएर घर चलाउने छोरा रहेन । हाम्रो परिवारको खुसी भागवानले खोस्यो । अब घर कसले चलाउँछन्, ऋण कसले तिर्छन्’ रामपरी भक्कानिँदै भन्छिन्, ‘म आफैँ बिरामी छु । ऋणको चिन्ताले निन्द्रा पर्दैन ।’

लालबाबुका बुवा रामउगदारसमाजले सुनाएको निर्णय लगत्तै रकमको जोहो गर्न लागिपरेका छन् । तर, कहीँबाट पनि ऋण नपाएपछि निराश हुनुपरेको उनले अनलाइनखबरलाई बताए ।

‘घर चलाउनै मुस्किल छ । घडेरी बेच्न खोज्दा फालेको भाउमा माग्छन्’ रामउदगारले भने, ‘बुहारी पक्षलाई तीन लाख तिर्ने समय पुग्न लाग्यो । कहाँबाट तिर्ने भन्ने उपाय नै छैन ।’

घरमा पालेको भैंसीले दिएको दूध बेचेर जेनतेन परिवार चलाइरहेको उनले बताए । ‘श्रीमतीलाई उपचार गराउन सकेको छैन । जेठो छोरो पनि अशक्त छ,’ उनले भने, ‘मेरो सबै घर कान्छो छोराले नै चलाएको थियो । अब त ऊ नै रहेन ।’

परिवारमा लागेको ऋणको ब्याजसँगै जीवन गुजाराको चिन्ताले थलिएका रामउदगारले आर्थिक सहयोगका लागि अपिल गरेका छन् ।

– यस समाचारको श्रोत : Online Khabar हो ।