पहिलो पटक वाफ वुमेन्स च्याम्पियनसिपमा नेपाल, आज सिरियासँग खेल्ने
८ फागुन, काठमाडौं । पहिलो पटक वाफ वुमेन्स च्याम्पियनसिपमा सहभागी भएको नेपालले आफ्नो पहिलो खेल आज सिरियासँग खेल्दैछ । सिरियासँग नेपालको यो पहिलो खेल हुनेछ ।
खेल साउदी अरबको जेद्दास्थित किंग अब्दुल्लाह स्पोर्ट्स सिटी स्टेडियममा नेपाली समय अनुसार बेलुकी पौने ८ बजे हुने छ ।
एन्जिला तुम्बापो सुब्बाको कप्तानीमा २३ सदस्यी टोली च्याम्पियनसिप खेल्न गएको नेपाली टिमले साउदी अरबमा पुगेर अभ्यास पनि गरेको छ ।
फ्रेन्च लिग खेल्दै इतिहास बनाएकी सावित्रा भण्डारी साम्बा पनि उतैबाट साउदी पुगेकी छिन् । उनी नेपाली टिमकी मुख्य हतियार हुन् ।
अन्तर्राष्ट्रिय सहभागिको करिब चार दशकमा नेपाली महिला टोली उपाधि जित्न सकेको छैन ।
१० पटक फाइनल खेल्दा सबैमा पराजित भएको नेपाललाई यसपटक उपाधि खडेरी तोड्ने अवसर छ ।
साउदी अरेबियाको जेदाहमा हुने आठौं संस्करणको प्रतियोगितामा कूल ८ टिम सहभागी छन् ।
नेपाल रहेको समूह बी मा सिरियासँगै प्यालेस्टाइन र इराक छन् । समूह ए मा आयोजक साउदी सहित ५ पटकको विजेता जोर्डन, ग्वाम र लेबानोन छन् ।
नेपालसहित आयोजक साउदी र ग्यामले पहिलो पटक यो प्रतियोगितामा सहभागी भएका हुन् ।
– यस समाचारको श्रोत : Online Khabar हो ।