दोलखामा ट्याक्टर दुर्घटना हुँदा एक जनाको मृत्यु
२३ चैत, काठमाडौं । दोलखामा ट्याक्टर दुर्घटना हुँदा एक जनाको मृत्यु भएको छ भने ४ जना घाइते भएका छन् ।
जिल्लाको कालिन्चोक गाउँपालिका २ पुटिस्याङबाट सिंगटी तर्फ आउँदै गरेको लु ३ त १७१४ नं.को ट्याक्टर आज बिहान १० बजेतिर दुर्घटना हुँदा एक जनाको घटनास्थलमै मृत्यु भएको हो ।
मृत्यु हुनेमा दोलखाको कालिन्चोक २ बाबरे बस्ने अन्दाजी ३६ वर्षीया सन्चीमाया थामी रहेको जिल्ला प्रहरी कार्यालय दोलखाले जनाएको छ । ट्याकटरले थिचेर उनको घटनास्थलमा नै मृत्यु भएको सूचना अधिकारी एवम् प्रहरी निरीक्षक जीवन श्रेष्ठले जानकारी दिए ।
दुर्घटनामा मृतक सन्चीमाया थामीकी छोरी १७ वर्षीया अस्मिता थामी, ३० वर्षीया बाल कुमारी थामी, ३० वर्षकै निशा धामी र ३ वर्षीया बालिका टुकी थामी घाइते भएका छन् । बालकुमारीको अवस्था गम्भीर छ भने अन्यको अवस्था मध्यम रहेको प्रहरीले जनाएको छ ।
ट्याक्टर चालक दोलखाको गौरीशंकर गाउँपालिका ५ बस्ने अन्दाजी २२ वर्षीय अबराम थामीलाई प्रहरीले नियन्त्रणमा लिएको छ ।
– यस समाचारको श्रोत : Online Khabar हो ।