महिला लिग छनोटमा कोशीको लगातार तेस्रो जित

१२ वैशाख, काठमाडौं । समीक्षा मगरले २ गोल गरेपछि कोशी प्रदेशले एन्फा महिला लिग छनोटमा बुधबार गण्डकी प्रदेशलाई ३–० ले पराजित गरेको छ ।

छनोट प्रतियोगितामा लगातार तेस्रो जित हात पारेको कोशी ३ खेलबाट ९ अंकसहित शीर्ष स्थानमा छ ।

सुर्खेतस्थित कर्णाली स्टेडियममा भएको खेलमा कोशीका लागि समीक्षाले छैटौं र ९०औं मिनेटमा गोल गरिन् । ममता राउतले ५२औं मिनेटमा १ गोल गरिन् ।

कोशीले यसअघि कर्णाली र सुदूरपश्चिम प्रदेशलाई पराजित गरेको थियो ।

प्रतियोगितामा गण्डकीको भने यो दोस्रो हार हो । ३ खेलबाट गण्डकीको ३ अंक छ । पहिलो खेलमा सुदूरपश्चिमसँग पराजित भएको गण्डकीले दोस्रो खेलमा लुम्बिनी प्रदेशलाई हराउँदै पहिलो जित निकालेको थियो ।

बुधबारै सुदूरपश्चिम र मधेश प्रदेशबीच पनि खेल हुँदैछ ।

– यस समाचारको श्रोत : Online Khabar हो ।