अनलाइनखबरकर्मी शर्मालाई उत्कृष्ट पत्रकारिता पुरस्कार

१५ वैशाख, बुटवल । नेपाल पत्रकार महासंघ रुपन्देहीले प्रदान गर्दै आइरहेको उत्कृष्ट पत्रकारिता पुरस्कार–२०७८ बुटवलस्थित अनलाइनखबरकर्मी टोपराज शर्माले प्राप्त गरेका छन् ।

बुटवल उपमहानगरपालिकाको आर्थिक सहयोगमा स्थापित यो पुरस्कार शनिबार महासंघको अधिवेशन तथा साधारणसभामा प्रदान गरिएको हो । नेपाल पत्रकार महासंघका अध्यक्ष विपुल पोखरेल, रुपन्देही अध्यक्ष रामराज पोखरेल र बुटवल उपमहानगरपालिकाकी उपप्रमुख सावित्रादेवी अर्यालले पत्रकार शर्मालाई नगद ५० हजार रुपैयाँ र सम्मानपत्रले पुरस्कृत गरेका हुन् ।

शर्मा २०६१ सालदेखि पत्रकारितामा क्रियाशील छन् । यस्तै उत्कृष्ट पत्रकारिता पुरस्कार–२०७९ पत्रकार कपिल ज्ञवालीलाई प्रदान गरिएको छ । पत्रकार महासंघका पूर्वअध्यक्ष यानेन्द्र जिसी संयोजक तथा आरपी आचार्य र रेखा भुसाल सदस्य रहेको मूल्यांकन समितिले पुरस्कृत हुने पत्रकार छनोट गरेको हो ।

सिद्धार्थनगर नगरपालिकाको सहकार्यमा स्थापित सिद्धार्थ श्रमजीवि पत्रकारिता पुरस्कार दीपक घिमिरेलाई प्रदान गरिएको छ । सिद्धार्थ श्रमजिवीको पुरस्कार राशी १० हजार रहेको छ ।

सो अवसरमा महासंघका अध्यक्ष विपुल पोखरेलले कोरोना महामारी, आर्थिक मन्दी लगायत कारणले विज्ञापन बजार खुम्चिन गई सञ्चार क्षेत्रमा संकट सिर्जना भएको र यसले पत्रकारिता पनि प्रभावित हुन पुगेको बताए । सञ्चार क्षेत्रमा देखिएको समस्या समाधानका लागि सरकारले स्पष्ट नीति र योजना बनाउनुपर्ने अध्यक्ष पोखरेलले बताए ।

नेपाल प्रेस काउन्सिलका अध्यक्ष बालकृष्ण बस्नेतले आचारसंहिताको पूर्ण पालना गरी जिम्मेवार र जवाफदेही पत्रकारिता गर्न आग्रह गरे ।
बुटवल उपमहानगरपालिकाकी उपप्रमुख सावित्रा अर्यालले खोज पत्रकारितालाई प्रोत्साहनका लागि उपमहानगरले उत्कृष्ट पत्रकारिता पुरस्कार स्थापनामा महासंघसंग सहकार्य गरेको बताइन् ।

– यस समाचारको श्रोत : Online Khabar हो ।