‘पुजार सार्कीमा अभिनय क्षमता प्रमाणित गरेकी छु’

काठमाडौं । अभिनेत्री अञ्जना बराइलीको पहिलो फिल्म हो ‘महापुरुष’ । अडिसनमार्फत छानिएकी उनले अर्को फिल्म ‘पुजार सार्की’को लागि भने अडिसन नै दिनुपर्‍यो ।

यो अडिसन भने ‘क्यारेक्टर अडिसन’ थियो । त्यसो त निर्देशक दिनेश राउतका हरेक फिल्ममा स्थापित कलाकारले पनि क्यारेक्टर अडिसन दिने गर्छन् । जल्दोबल्दो उदाहरण ‘प्रकाश’को लागि अभिनेता प्रदीप खड्काले दिएको अडिसन हो ।

चर्चित गीत ‘घुमी घुमी’मा अञ्जनाले गरेको अभिनय हेरेर निर्देशक राउतले ‘पुजार सार्की’मा उनलाई कास्ट गर्ने सोच बनाएर कुरा अघि बढाएका थिए । ‘निर्देशकज्यूले कथा सुनाउने बित्तिकै यो फिल्म वास्तविकतामा आधारित भएकाले मैयाँको चरित्र मैले गर्न पाए हुन्थ्यो जस्तो लाग्यो’ उनले भनिन् ।

त्यसपछि अञ्जनाले क्यारेक्टर डिजाइन अनुसार मैयाँ पात्रका लागि अडिसन दिइन् । अभिनयसँगै लुक टेस्टको पनि कुरा आएपछि उनले दुई पटक लुक टेस्ट दिइन् ।

‘महापुरुषमा पनि अडिसन दिएकाले अडिसन दिन मलाई गाह्रो भएन । तर पहिलो लुक टेस्टमा क्यारेक्टरको टोन बढी डार्क भएको भन्ने कुरा आएपछि दोस्रो पटक लुक टेस्टमा पास भएपछि फिल्ममा जोडिएँ’ अञ्जनाले सम्झिइन् ।

‘पुजार सार्की’मा जोडिनु अघि नै उनले कौसी थिएटरमा एक महिनाको अभिनय कक्षा लिइसकेकी थिइन् । डेढ महिनाको कक्षा भए पनि ‘पुजार सार्की’को वर्कसप सुरु भएकाले उनले एक महिनाको मात्र अभिनय कक्षा लिइन् ।

यो फिल्ममा अञ्जनाको जोडीको रूपमा आर्यन सिग्देल छन् । आर्यन उनको सानै देखिको ‘क्रस’ हुन् । आफ्नै ‘क्रस’सँग अनस्क्रिनमा जोडिन पाउँदा उनलाई उत्तिकै डर भएको थियो ।

‘मैले धेरै फिल्ममा काम गरेको छैन । त्यसमाथि यो फरक विधाको मजबुत विषय भइसकेपछि आफ्नो चरित्रलाई अझ मजबुत कसरी बनाउने भन्ने डर हुन्छ’ भन्छिन्, ‘आर्यन दाइले ‘तिमीलाई मसँग अभिनय गर्दा गाह्रो भइरहेको छ भने भन्नुभन्दा मलाई थप ऊर्जा प्राप्त हुन्थ्यो । मैले धेरै पटक रिटेक खाँदा पनि उहाँ कहिल्यै रिसाउनुभएन । ‘यस्तै हुन्छ’ भनेर ढाडस दिनुहुन्थ्यो । सिनियर स्टार यति सरल हुन्छन् होला भन्ने कल्पना समेत थिएन’ उनले भनिन् ।

फिल्ममा उनले कथित सार्की समुदायको पात्रको रोल गरेकी छन् । उनको पात्र समाजले ठूलो जात भन्ने गरेको अर्थात् ब्राम्हणको छोरासँग प्रेममा परेकी हुन्छिन् तर, समाजले भने सम्बन्ध स्वीकार गर्न गाह्रो मान्छ ।

‘त्यो सम्बन्धलाई दिगो सम्बन्धमा परिणत गर्ने बेलासम्म के कति बाधा अड्चन आउँछन् र के कति संघर्ष गर्नुपर्छ भन्ने कुरा मेरो चरित्रले देखाउँछ । म समाजबाट दबिएको पीडित, त्यसमाथि पूजारसँगको सम्बन्धका कारण समाजले बहिस्कार गरेपछि झन् पीडित चरित्रमा छु’ आफ्नो भूमिकाबारे उनले भनिन् ।

अञ्जनालाई वर्कसपको बेला स्क्रिप्ट पढेदेखि नै आफ्नो चरित्र किन यसरी दबिएको भन्ने चिन्ता परेको थियो । त्यही भएर उनले लेखक विकास सुवेदीलाई बारम्बार यही प्रश्न गरिरहन्थिन् । फिल्मको चरित्र भन्दा पनि अञ्जना भएर हेर्दा उनलाई ‘मलाई किन यस्तो भूमिका दिइयो?’ भन्ने मनमा लाग्थ्यो, हल्का रिस पनि उठेको थियो ।

अञ्जनाले यो फिल्ममा काम गर्नुभन्दा अघि जातीय विभेदका घटनाबारे नसुनेकी भने होइनन् । तर, किन यस्ता घटना हुन्छन् भन्ने कुरा स्क्रिप्ट पढेपछि र वर्कसपमा बसेपछि मात्र थाहा पाइन् ।

‘स्क्रिप्ट पढ्दै जाँदा र स्क्रिप्ट अनुसार दृश्य बनाइरहँदा यहाँ पुगेर यतिको हिंसा हुने रहेछ भन्ने थाहा पाएँ । स्क्रिप्टले यो सबै सहजै बुझाउँथ्यो । स्क्रिप्ट पढिसक्दा यहाँ हिंसाको अवस्था यसरी हुँदो रहेछ भन्ने थाहा भयो’ उनले भनिन् ।

‘महापुरुष’ हेरेका दर्शकले आफूलाई ‘पुजार सार्की’मा अझ बढी माया गर्नेमा अञ्जना ढुक्क छिन् । ‘अञ्जनाले अवसर पाइन् भने काम गरेर देखाउँछिन् भन्ने कुरालाई मैले ‘पुजार सार्की’मा प्रमाणित गरेकी छु । मेरो हकमा महापुरुष र पुजार सार्कीको मेरो पात्र फरक पात्र हुन् । फरक परिवेश, फरक चरित्रका कारण पनि दर्शकले मलाई माया गर्नुहुनेछ भन्नेमा विश्वस्त छु’ उनी भन्छिन् ।

बिहीबार रिलिज हुने फिल्म ‘पुजार सार्की’मा प्रदीप खड्का, पल शाह, परीक्षा लिम्बु लगायतको पनि प्रमुख अभिनय छ । सुवास भुसालले यो फिल्म निर्माण गरेका हुन् ।

– यस समाचारको श्रोत : Online Khabar हो ।