सप्ताहन्त बक्स अफिसमा कुन फिल्मको ओपनिङ कस्तो होला ?

काठमाडौं । ‘बोक्सीको घर’को वेभ जारी रहँदा बिहीबार दुई नेपाली फिल्म रिलिज हुँदैछन् । अनमोल केसी स्टारर ‘फर्की फर्की’ र प्रदीप खड्का स्टारर ‘पुजार सार्की’ आउँदैछन् । शुक्रबार हलिउडको प्रतीक्षित ‘म्याड म्याक्स’ सिरिजको पछिल्लो श्रृंखला ‘फ्युरिओसा’ रिलिज हुँदैछ ।

एकातिर चलेका कलाकार समावेश नेपाली फिल्म, अर्कोतिर यस वर्षको प्रतीक्षित हलिउड फिल्म ‘फ्युरिओसा’ हलमा लाग्दैछन् । पछिल्ला सप्ताहन्तको व्यापार हेर्ने हो भने ‘बोक्सीको घर’को गति कम भइसकेको छैन । अहिले पनि मल्टिप्लेक्समा ५० प्रतिशतभन्दा तलको अकुपेन्सीमा ‘बोक्सीको घर’ चलिरहेको छ ।

अब प्रश्न उठ्छ– यी चार फिल्मलाई हलले कसरी शो विभाजन गर्नेछन् ? हलले बिहीबारको लागि ‘फर्की फर्की’ र ‘पुजार सार्की’लाई ५०-५० प्रतिशतको अनुपातमा शो बाँडेका छन् । शुक्रबार यी दुईसँगै म्याड म्याक्स र बोक्सीको घरले कति शो पाउनेछन् भन्ने कुरा रोचक हुनसक्छ ।

हुनसक्छ, यही जटिलताका कारण हलहरुले बिहीबार एकदिनको लागि मात्र शो खुलाएका छन् । हल सञ्चालक ‘फर्की फर्की’ र ‘पुजार सार्की’को प्रिमियरबाट आउने नतिजाको आधारमा सप्ताहन्तलाई शो बाँड्ने तयारीमा रहेको बुझिएको छ ।

फिल्मको व्यावसायिक भविष्यको लागि मुख्यतः स्टारभन्दा महत्वपूर्ण कुरा क्राफ्ट हो । शो संख्या र हाइप हेर्दा बुद्धजयन्तीको बिदाको दिनमा यी दुवै नेपाली फिल्मले ओपनिङ राम्रो गर्न सक्ने अनुमान छ ।

व्यावसायिक भविष्य भने दर्शकको ‘वर्ड अफ माउथ’मा निर्भर हुनेछ । यदि निर्देशक निश्चल बस्नेतले भनेजस्तै हुने हो भने ‘फर्की फर्की’को ओपनिङ आक्रामक हुनसक्छ ।

अर्कोतर्फ, कथावस्तु र क्राफ्टिङको कुरा गर्दा ‘पुजार सार्की’ पनि बक्स अफिसको अर्को प्लेयर हो । शुक्रबारको यी दुईको फिल्मको व्यापार ‘फ्युरिओसा’को ओपनिङ र ‘बोक्सीको घर’को कमाइमा पनि निर्भर हुनेछ । केही दिनअघि कान्स फिल्म फेस्टिभलमा वर्ल्ड प्रिमियर भएको फ्युरिओसाले राम्रै समीक्षा प्राप्त गरेको छ ।

नेपालमा म्याड म्याक्स सिरिजका फ्यान पनि प्रशस्तै छन् । दर्शकलाई रुचिको जनराअनुसार फिल्म हेर्ने सुविधा उपलब्ध हुने देखिन्छ । यस्तोमा आगामी सप्ताहन्त नेपाली बक्स अफिसमा त्रिकोणात्मक भिडन्त निश्चित छ ।

– यस समाचारको श्रोत : Online Khabar हो ।