कस्तो अवस्थामा बच्चालाई एनआईसीयूमा राखिन्छ ?

जन्मिनेबित्तिकै शिशुमा श्वासप्रश्वाससम्बन्धी समस्या भएमा एनआईसीयूमा राखिन्छ । नवजात शिशुलाई राखिने भेन्टिलेटरसहितको उपचार कक्षलाई नवजात शिशु सघन उपचार कक्ष अर्थात् एनआईसीयू भनिन्छ ।

कस्तो अवस्थामा एनआईसीयूमा राखिन्छ ?

शिशु जन्मिनेबित्तिकै श्वासप्रश्वासमा समस्या अर्थात् श्वास फेर्न समस्या भएमा, शिशुको रगतमा ग्लुकोजको कमी भएमा, शिशुको तौल एकदम कम भएमा, मेनिनजाइटिस (रक्तसञ्चारमा ब्याक्टेरियाको कारण हुने संक्रमण) भएमा एनआईसीयूमा राखिन्छ । त्यस्तै शिशुमा जन्मिंदा मुटु, फोक्सो, आन्द्राको विकास राम्रोसँग नभएको अवस्थामा पनि एनआईसीयूमा राख्नुपर्ने हुन्छ ।

शिशुलाई आमाको गर्भमा नै हुँदा वा बाहिरी संक्रमण जस्तै गम्भीर खालको निमोनिया र रगतमा संक्रमण भएमा, शिशुलाई शल्यक्रिया गर्नुपर्ने अवस्थामा, आमा र शिशुको ब्लड ग्रुप नमिल्दा पनि एनआईसीयूमा राख्नुपर्ने हुन्छ ।

खासगरी समयअगावै जन्मेको शिशु अर्थात् ३२ हप्ताभन्दा अघि जन्मिएका शिशुलाई एनआईसीयूमा राख्नुपर्ने हुन्छ । त्यस्तै कतिपय शिशुलाई एसएनसीयू अर्थात् स्पेसल न्युबर्न केयर युनिटमा पनि राख्नुपर्ने हुन्छ । शिशुको स्वास्थ्य अवस्था बिग्रिने आशंका भएका शिशुलाई यसमा राखिन्छ । साथै एनआईसीयूबाट उपचार भएर आएका शिशुलाई यसमा राखेर हेरचाह गरिन्छ ।

कति दिन राख्नुपर्ने हुन्छ ?

एनआईसीयूमा राख्ने समयावधि शिशुको स्वास्थ्य अवस्थामा निर्भर गर्छ । तर सामान्यतया यसमा कम्तीमा ४८ देखि ७२ घण्टा राखिन्छ भने कतिपय शिशुलाई दुई महिनासम्म पनि राख्नुपरेको अवस्था छ ।

एनआईसीयूमा राखेको शिशुलाई के खुवाइन्छ ?

एनआईसीयूमा राखेको शिशुलाई बाहिरी खानेकुरा प्राय: खुवाइँदैन । किनभने नवजात शिशुको शरीर एकदम कमलो हुन्छ । तिनीहरुलाई एउटा वयस्कलाई जस्तै फोक्सोमा समस्या भए फोक्सोमा मात्र समस्या देखिन्छ तर शिशुको हकमा मुख्य समस्या फोक्सोमा भएपनि अन्य अंगले पनि काम नगरेको हुनसक्छ । त्यसैले एनआईसीयूमा राखेको शिशुलाई चाहिने पोषकतत्व जस्तै ग्लुकोज, पानी, प्रोटिन सलाइन र सुईमार्फत दिइन्छ ।

कतिपय अवस्थामा शिशुको अत्याधिक गम्भीर नभएको अवस्थामा भेन्टिलेटरमा भएको शिशुलाई नाकबाट पाइप छिराएर आमाको दूध खुवाइन्छ । शिशुलाई एनआईसीयूमा राखेको दुई-तीन त बाहिरको खानेकुरा केही पनि दिइँदैन ।

एनआईसीयूमा राखेको शिशुमा दीर्घकालीन कुनै असर हुन्छ ?

धेरै समय एनआईसीयूमा राखेर उपचार गरिएका शिशुमा भेन्टिलेटरको कारण फोक्सोको प्रेसर बढ्ने समस्या हुनसक्छ । त्यस्तै एनआईसीयूमा राखेका शिशुलाई नसामार्फत औषधि दिने भएकाले पछि नसा ब्लक हुने समस्या हुनसक्छ । जस्तै- शिशुले जन्मिनेबित्तिकै श्वास फेरेन भने मस्तिष्कमा अक्सिजनको कमी भएर दिमागमा असर गर्छ । यसले गर्दा पछि शिशुमा अपांगता हुने, मानसिक समस्या हुने हुनसक्छ । एनआईसीयूमा राखेको कारणले भन्दा पनि एनआईसीयूमा राख्नुभन्दा पहिला देखिएको समस्याले दीर्घकालीन असर पुर्‍याउन सक्छ ।

गर्भावस्थामा समस्या भएमा

गर्भावस्थामा उच्च रक्तचाप, मधुमेह, पाठेघरको बनावटमा समस्या, गर्भवती महिलामा कुनै क्रोनिक रोगको समस्या देखिएमा शिशु जन्मिसकेपछि एनआईसीयूमा राख्नुपर्ने हुनसक्छ । किनभने यस्ता शिशुमा शरीरको विकास राम्रोसँग हुन पाएको हुँदैन ।

खर्च कति लाग्छ ?

शिशुको स्वास्थ्य अवस्थाअनुसार खर्च फरक-फरक हुन्छ । तर थापाथलीस्थित परोपकार प्रसूति तथा स्त्रीरोग अस्पतालमा एनआईसीयूको उपचार निःशुल्क छ ।

– यस समाचारको श्रोत : Online Khabar हो ।