१०औं नेपाल एमेच्योर ओपनको टिमतर्फ भारतलाई उपाधि

१७ जेठ, काठमाडौं । भारतका शात मिश्रा र सुमित कोटवालले १०औं नेपाल एमेच्योर ओपनको टिमतर्फको उपाधि जितेका छन् ।

३६ होलको समाप्तीमा ९–अन्डर २ सय ७९ को स्कोरमा नेपाल बी टिमलाई ११ स्ट्रोकको फराकिलो अन्तरमा हराउँदै भारतले उपाधि जितेको हो ।

गत संस्करण नेपालले टिमतर्फको उपाधि जितेको थियो । शातले १ सय ३३ र सुमितले १ सय ४६ स्कोर गर्दा टिमले २ सय ७९ स्कोर बनाएर पहिलो स्थान प्राप्त गरेको हो ।

राहुल विश्वकर्मा र वाङचेन ढोन्डुप सम्मिलित नेपाल बी टिम २–ओभर २ सय ९० को स्कोरमा दोस्रो भएको छ । राहुलले १ सय ३९ र वाङचेनले १ सय ५१ स्कोर बनाए ।

सदभाव आचार्य र टासी छिरिङ सम्मिलित नेपाल ए टिमले ३–ओभर २ सय ९१ सहित तेस्रो स्थान प्राप्त गर्‍यो ।

प्रतियोगिताको पुरुष स्पर्धामा भारतका शात मिश्रा ११–अन्डर १ सय ३३ को शानदार स्कोरमा नेपालका राहुल विश्वकर्मालाई ६ स्ट्रोकले पछि पार्दै शीर्ष स्थानमा रहेका छन् ।

पहिलो दिनका संयुक्त लिडर शातले आज दिनकै उत्कृष्ट ६–अन्डर ६६ को स्कोर दर्ज गरे । नेपालका राहुलले इभन–पार ७२ मा दोस्रो दिनको खेल सकाउँदै समग्रमा ५–अन्डर १ सय ३९ सहित दोस्रो स्थानमा झरे ।

समग्रमा १–अन्डर १ सय ४३ को स्कोरमा भारतका सुरज जोशी र नेपालका सदभाव आचार्य संयुक्त रूपमा तेस्रो स्थानमा रहेका छन् । सुरजले आज १–अन्डर ७१ र सदभावले २–ओभर ७४ को स्कोर निकाले । समग्रमा २–ओभर १ सय ४६ सहित डिफेन्डिङ च्याम्पियन भारतका सुमित कोटवाल र बङ्गलादेशका सहाव उद्दिनले संयुक्त रूपमा पाँचौ स्थान लिए । सुमितले १–ओभर ७३ र सहाबले २–ओभर ७४ को स्कोरमा दोस्रो दिनको खेल सकाए ।

शातले लगातार दोस्रो दिन बोगीरहित कार्ड तयार पार्ने क्रममा फ्रन्ट नाइन ४–अन्डर ३२ र ब्याक नाइन २–अन्डर ३४ मा पूरा गरे । उनले तेस्रोदेखि पाँचौ होलमा लगातार तीन बर्डी तथा सातौं, ११औं र १३औं होलमा एक–एक सट बचाउँदै कुल ६ बर्डी प्रहार गरे ।

राहुलले फ्रन्ट नाइन १–ओभर ३७ मा सकाए । तेस्रो र छेठौं होलमा बर्डी प्रहार गर्दा दोस्रो, चौथो र आठौं होलमा एक–एक सट खेर फाले । यसपछि १८औं होलको बोगीका विरुद्ध ११औं र १२औं होलको बर्डीले ब्याक नाइन १–अन्डर ३५ मा पूरा गरे ।

महिलातर्फ श्रीलंकाकी काया दलुवाटेले समग्रमा २–अन्डर १ सय ४२ सहित भारतकी दिया क्रिस कुमारमाथि ६ स्ट्रोकको अग्रता बनाएकी छन् । कायाले आज १–अन्डर ७१ को स्कोर खडा गरिन् । आज ४–ओभर ७६ खेलेकी दिया समग्रमा ४–ओभर १ सय ४८ सहित दोस्रो स्थानमा रहेकी छन् ।

समग्रमा ७–ओभर १ सय ५१ सहित भारतकी अनाथी विवेक(७४) र मानवी सिंगानिया (७८) संयुक्त रूपमा तेस्रो स्थानमा छन् । डिफेन्डिङ च्याम्पियन नेपालकी कश्मीरा शाह समग्रमा १२–ओभर १ सय ५६ सहित पाँचौ स्थानमा तल झरिन् । उनले आज १२–ओभर ८४ को प्रदर्शन गरिन् । उनले फ्रन्ट नाइन इभन–पार ३६ मा पूरा गरे पनि ४ पारको १४औं होलमा ७ सट खेर फाल्दा खराब नतिजा आएको हो ।

लिडर कायाले तेस्रो र नवौं होलको बर्डीले फ्रन्ट नाइन २–अन्डर ३४ मा सकाइन् । यसपछि १५औं होलमा एक सट बचाए पनि १७औं होलमा डबल बोगी खेप्न बाध्य भइन। ब्याक नाइन १–ओभर ३७ मा पूरा गरिन् ।

दियाले फ्रन्ट नाइन ३–ओभर ३९ मा सकाउने क्रममा दोस्रो, तेस्रो, पाँचौ र आठौं होलमा बोगी प्रहार गरिन् । सातौं र नवौं होलमा एक–एक बचाइन् । यसपछि ११औं होलको बोगीले ब्याक नाइन १–ओभर ३७ मा पूरा गरिन् ।

५४ होलको तीन दिने प्रतियोगितामा पुरूषतर्फ ३१ र महिलातर्फ ८ खेलाडीले अन्तिम १८ होलको लागि कट बनाएका छन् ।

प्रतियोगितामा नेपाल, भारत, श्रीलंका, बंगलादेश र भुटान गरी पाँच देशका खेलाडीको सहभागिता छ ।

नेपाल गल्फ संघको आयोजनामा भएको प्रतियोगितामा राष्ट्रिय खेलकुद परिषद्, नेपाल पर्यटन बोर्ड, गोकर्ण फरेस्ट गल्फ रिसोर्ट र होटल रोयल सिंङ्गीको सहयोग रहेको छ ।

– यस समाचारको श्रोत : Online Khabar हो ।