१ किलो सुन तस्करी प्रकरणमा ४ जनाविरुद्ध सम्पत्ति शुद्धीकरण मुद्दा

१० साउन, काठमाडौं । करिब १ किलो सुन तस्करीमा संलग्नको आरोप लागेका ४ जनाविरुद्ध सम्पत्ति शुद्धीकरणको मुद्दा दायर गरिएको छ ।

२५ भदौ २०८० मा प्रहरीले ९६० ग्राम सुनसहित काभ्रेको खानीखोला गाउँपालिका–३ का २८ वर्षीय बाबुलाल दोङ, रोशी गाउँपालिका–३ का ३३ वर्षीय जगत लामा र महाभारत गाउँपालिका–३ का ३६ वर्षीय मिङमा दोर्जे स्याङतानलाई पक्राउ गरेको थियो ।

सो घटनामा फरार रहेका काभ्रेकै महाभारत गाउँपालिका–२ का ३२ वर्षका विकास योञ्जन पनि गत ३१ असारमा पक्राउ परेका छन् । उनीहरु चारै जनालाई त्रिभुवन विमानस्थल भन्सार कार्यालयले विशेष अदालतमा सम्पत्ति शुद्धीकरणको मुद्दा दायर गरेको हो ।

बाबुलाल दोङ, जगत लामा र मिङमा दोर्जेलाई जनही ९२ लाख १७ हजार ९२० रुपैयाँ बिगो कायम गरिएको छ । उनीहरुले उक्त रकम सुन चोरी पैठारी वापत आर्जन गरेको आरोप छ ।

विकास योञ्जनको हकमा भने १ करोड १७ लाख १७ हजार ९२० रुपैयाँ बिगो कायम गर्दै मुद्दा दायर गरिएको छ । योञ्जनले पनि सुन चोरी पैठारीमार्फत ९२ लाख १७ हजार ९२० र जेबी कन्सट्रक्सन एण्ड सप्लायर्सको शेयर खरिद वापत २५ लाख गरी १ करोड १७ लाख १७ हजार ९२० रुपैयाँ गैरकानुनी आर्जन गरेको भन्सार कार्यालयको दाबी छ ।

गत वर्ष भदौमा पक्राउ परेका दोङ, लामा र दोर्जे सुन चोरी पैठारीको कसुरमा हाल पुर्पक्षका लागि थुनामा छन् ।

मुख्य नाइके योञ्जन

योञ्जनलाई पक्राउ गरेपछि प्रहरीले थप अनुसन्धान तथा कारबाहीका लागि विमानस्थल भन्सार कार्यालय पठाएको छ । जिल्ला प्रहरी परिसर काठमाडौंका प्रवक्ता एसपी नवराज अधिकारीले बरामद ९६० ग्राम सुनको धनी योञ्जन नै रहेको प्रारम्भिक अनुसन्धानबाट देखिएको बताए ।

गत वर्ष पक्राउ परेका दोङले योञ्जनकै योजनाअनुसार भिजिट भिसामा दुबई गएर सुन ल्याएको खुलेको छ । दोङले समेत बयानमा यो विषय स्वीकार गरेका प्रहरीको भनाइ छ ।

२५ भदौमा दुबईबाट हिमालयन एयरलाइन्समार्फत काठमाडौं ओर्लिएका दोङ भन्सार जाँचपास गरेर समेत बाहिरिएका थिए । अग्रिम सूचना पाएको प्रहरीले दोङलाई विमानस्थल अगाडिकै सडकबाट नियन्त्रणमा लिएको थियो । लेदो बनाएर मलद्वारमा लुकाएर ल्याएको सुन दोङबाट प्रहरीले बरामद गरेको थियो ।

तस्करीको सुन र भरिया पक्राउ परेपछि योञ्जन भने फरार भएका थिए । सुन रिसिभ गर्न आएका जगत लामा र मिङमा दोर्जेलाई प्रहरीले २६ भदौ २०८० मा ढल्कुबाट पक्राउ गरेको थियो ।

मलद्वारमा सुन लुकाएर ल्याउने बाबुलाल गत वर्षको भदौअघि असारमा पनि दुबई गएर फर्केको खुलेको छ । दुई पटक जाँदा आउँदाको टिकट समेत योन्जनले नै काटिदिएको उनले बयानमा बताएका प्रहरीको भनाइ छ ।

दुबई पुगेपछि एक भारतीय नागरिकले आफूलाई सुन दिने गरेको उनले बताएका छन् । दुबईबाट सुन ल्याए वापत एक पटकको ५० हजार रुपैयाँ योञ्जनले दिने गरेको बाबुलालले बताएका एक प्रहरी अधिकारीले बताए ।

कार नै छाडेर एक वर्षदेखि फरार थिए योञ्जन

हाल पक्राउ परेका योञ्जन सुन बरामद भएदेखि नै कार छाडेर फरार थिए । सुनसहित बाबुलाललाई पक्राउ गरेपछि उनकै सूचनाका आधारमा मिङमा र जगत पनि पक्राउ परेका थिए ।

तर योञ्जन भने आफैंले चलाएको बागमती प्रदेश ०१–०२७ च ९९६० नम्बरको गाडी छाडेरै फरार भएका थिए । योञ्जनको कारबाट विभिन्न व्यक्तिका नाम उल्लेख भएका १३ थान चेक बरामद भएका थिए ।

बरामद चेकमा ८७ लाख ५५ हजार ५ सय रुपैयाँ रकम उल्लेख थियो । जसमा तीर्थबहादुर लामाले ७ साउन २०७९ को मितिमा योञ्जनको नाममा काटेको ६ लाखको चेक समेत बरामद गरेको थियो । योञ्जनलाई चेक काट्ने लामा काभ्रेको क्षेत्र नम्बर १ ‘ख’ बाट निर्वाचित प्रदेशसभा सदस्य समेत हुन् ।

बागमती प्रदशेको खानेपानी, सिँचाई तथा उर्जामन्त्री समेत भइसकेका लामालाई यो घटनामा बयान कागज गराएको स्रोतले अनलाइनखबरलाई जानकारी दियो । लामाले आफूले योञ्जनसँग रकम सापटी लिएको र त्यसको एस्युरेन्सका लागि अग्रिम चेक काटेर दिएको बताएका छन् ।

योञ्जनको नाममा रहेको सानिमा विकास बैंकको खातामा पछिल्लो समय ३ करोड ८१ लाख रुपैयाँ जम्मा भएको र केही समयमै निकालिएको समेत भेटिएको छ । उनी यसअघि मोटरसाइकल चोरीको कसुरमा भीमफेदी कारागारमा बसेर चार वर्षअघि मात्रै जेलमुक्त भएका थिए ।

जेलबाट निस्केपछि भने उनी ठेक्कापट्टा र सुन तस्करीमा संलग्न रहेको खुलेको छ । ०७९ मा भएको निर्वाचनमा उनी नेपाली कांग्रेसको तर्फबाट काभ्रे क्षेत्र नम्बर–१ ‘क’ मा प्रदेशसभा सदस्यका लागि समानुपातिकमा समेत सिफारिस भएका थिए । प्रदेशसभा र प्रतिनिधि सभा निर्वाचनका लागि ‘क’ क्षेत्रकै प्रचारप्रसार समिति संयोजक समेत बनेका थिए ।

– यस समाचारको श्रोत : Online Khabar हो ।