राष्ट्र बैंकको लचकताले बढ्यो बैंकहरूको नाफा

७ कात्तिक, काठमाडौं । चालु आर्थिक वर्ष (चालु) २०८१/८२ को मौद्रिक नीतिमार्फत नेपाल राष्ट्र बैंकले बैंक तथा वित्तीय संस्थाको नियामकीय व्यवस्थामा अपनाएको लचकताले उनीहरूको नाफामा सुधार देखिएको छ ।

अधिकांश बैंकको खुद ब्याज आम्दानी गिरावट आए पनि सम्भावित कर्जा नोक्सानीका लागि गरेको ‘प्रोभिजन’ घट्दा बैंकहरूको नाफामा सुधार देखिएको छ ।

सञ्चालनमा रहेका २० वाणिज्य बैंकले चालु आव प्रथम त्रैमासको अपरिष्कृत वित्तीय विवरण प्रकाशित गरेका छन् । २० वाणिज्य बैंकको नाफा समग्रमा २०.१७ प्रतिशतले बढेको छ ।

गत आव प्रथम त्रैमासमा २० वाणिज्य बैंकले १३ अर्ब ४७ करोड २२ लाख रुपैयाँ नाफा कमाएका थिए । चालु आव सोही अवधिमा १६ अर्ब १८ करोड ९५ लाख नाफा कमाएका छन् ।

राष्ट्र बैंकले कोभिड-१९ पछि कसिलो बनाएको बैंक तथा वित्तीय संस्थाको नियामकीय नीति क्रमशः खुकुलो बनाउँदै लगेको छ । गत साउनमा सार्वजनिक मौद्रिक नीतिमार्फत असल वर्गमा वर्गीकरण भएको कर्जामा १.२ प्रतिशत कर्जा नोक्सानी व्यवस्था गर्नुपर्नेमा चालु आवबाट १.१ प्रतिशत मात्रै कर्जा नोक्सानी व्यवस्था गर्दा हुने भएको छ ।

यस्तै कर्जामा वर्गीकरण सम्बन्धी व्यवस्थामा समेत संशोधन गरेको थियो । भाखा नाघेको कर्जाको बक्यौता ब्याज असुल भएर ६ महिनासम्म नियमित भए मात्रै असल वर्गमा वर्गीकरण गर्न पाइने र ६ महिनासम्म जुन वर्गमा वर्गीकरण भएको थियो ।

सोही वर्गमा वर्गीकरण गर्दा कर्जा नोक्सानी व्यवस्था पनि त्यसै अनुसार गर्नुपर्ने व्यवस्था थियो । त्यसलाई संशोधन गर्दै चालु आवबाट भाखा नाघेको कर्जा असुल भएर नियमित हुनासाथ सूक्ष्म निगरानीमा राखेर ५ प्रतिशत मात्रै कर्जा नोक्सानी व्यवस्था गर्दा हुने र ६ महिनासम्म नियमित भए असल वर्गमा वर्गीकरण गर्न सक्ने व्यवस्था गरेको छ ।

यस्तै २२ असोजमा एकीकृत निर्देशन संशोधन गर्दै ५० मेगावाटभन्दा ठूला हाइड्रोपावरको ६० प्रतिशत निर्माण सम्पन्न भएपछि ग्रेस अवधिको पूँजीकृत ब्याज आम्दानी जनाउन सक्ने व्यवस्था गरिएको छ ।

राष्ट्र बैंकले नियामकीय व्यवस्थामा लिएको लचकताले गर्दा सम्भावित कर्जा नोक्सानी व्यवस्था घटेको छ । जसले खुद ब्याज आम्दानी घटे पनि बैंकहरूको नाफा समग्रमा बढेको छ । २० मध्ये १२ बैंकले नाफा बढाउँदा ८ बैंकको भने घटेको छ ।

चालु आव प्रथम त्रैमासमा बैंकहरूको खुद ब्याज आम्दानी ६.०९ प्रतिशतल घटेको छ । गत आव प्रथम त्रैमासमा ४९ अर्ब ५६ करोड ७७ लाख रहेको २० वाणिज्य बैंकको खुद ब्याज आम्दानी चालु आव सोही अवधिमा ४६ अर्ब ५४ करोड ९१ लाख मात्रै छ । २० मध्ये ६ बैंकको मात्रै खुद ब्याज आम्दानी वृद्धि हुँदा १४ बैंकको घटेको छ ।

आव प्रथम त्रैमासमै अधिक तरलता दबाब रहेका बैंकले बढी लागतको पैसा न्यून ब्याजदरमा राष्ट्र बैंकमा राख्नुपर्दा त्यसको चापसमेत परेको छ ।

आर्थिक वर्ष सुरुवातबाट नै ३ खर्बभन्दा बढी अधिक तरलता भए पनि बैंकहरूले राष्ट्र बैंकमा पैसा राखिरहेका छन् । जसका कारण ब्याज खर्चको तुलनामा आम्दानी वृद्धि हुन नसक्दा बैंकहरूको खुद ब्याज आम्दानी घटेको हो ।

गत आवमा उच्च व्यवसाय विस्तार गरेको प्राइम कमर्सियल सहित एभरेस्ट बैंकले भने खुद ब्याज आम्दानीसँगै नाफामा समेत राम्रो सुधार देखाएका छन् ।

चालु आव प्रथम त्रैमासमा प्राइम कमर्सियल बैंकको खुद ब्याज आम्दानी १६.६७ प्रतिशतले बढेको छ । त्यस्तै एभरेस्ट १३.०९, सिद्धार्थ ६.०१, माछापुच्छ्रे ४.९९, सिटिजन्स ३.५६ र प्रभु बैंकको ३.१६ प्रतिशतले खुद ब्याज आम्दानी बढेको हो ।

त्यस्तै कृषि विकास बैंकको सर्वाधिक २५.१९ प्रतिशतले खुद ब्याज आम्दानी घट्दा हिमालयनको २२.८८, स्ट्यान्डर्ड चाटर्ड १५.७५, राष्ट्रिय वाणिज्य १४ र सानिमा बैंकको १३.२७ प्रतिशतले घटेको छ । यसले उच्च दरमा खुद ब्याज आम्दानी घट्दा पनि नाफा भने समग्रमा बढेको हो ।

यस्तै नबिल बैंकको सम्भावित कर्जा नोक्सानीको प्रोभिजन घट्दा खुद ब्याज आम्दानी सामान्य गिरावट भए पनि नाफा ३९.९७ प्रतिशतले बढेर २ अर्ब ५ करोड ६६ लाख पुगेको छ ।

ग्लोबल आईएमईको खुद ब्याज आम्दानी १४.२२ प्रतिशतले घट्दा नाफा भने २३.३६ प्रतिशतले बढेको छ । खुद ब्याज आमदानी बढे पनि सम्भावित कर्जा नोक्सानी प्रोभिजन बढाउँदा प्राइम कमर्सियलको नाफा ११.७५ प्रतिशतले मात्रै बढेको छ ।

कर्जा नोक्सानी व्यवस्था घट्दा एनएमबी, कुमारी, स्ट्यान्डर्ड चाटर्ड, एसबीआई, नेपाल बैंक, लक्ष्मी सनराइज र सिद्धार्थ लगायतको नाफा बढेको हो ।

प्रथम त्रैमासमा नबिलपछि ग्लोबल आईएमईले १ अर्ब ५१ करोड र नेपाल इन्भेस्टमेन्ट मेगाले १ अर्ब ४६ करोड नाफा कमाएका छन् । त्यस्तै प्राइम कमर्सियलले १ अर्ब २९ करोड, एनएमबी १ अर्ब १४ करोड र एभरेस्टले १ अर्ब १२ करोड नाफा कमाएका छन् ।

एनएमबीको नाफा करिब १९ र एभरेस्टको ४४.४१ प्रतिशतले बढेको छ । त्यस्तै कुमारीले प्रोभिजन घटेसँगै नाफा १ सय ९ प्रतिशतले बढाएको छ । नेपाल एसबीआईको नाफा पनि ७० प्रतिशतले बढेको छ ।

नेपाल बैंकर्स संघका उपाध्यक्ष एवम् माछापुच्छ्रे बैंकका प्रमुख कार्यकारी अधिकृत सन्तोष कोइराला यस वर्षबाट बैंकहरूले ‘एक्पेक्टेड क्रेडिट लस’ अनसुार कर्जा नोक्सानी व्यवस्था सुरु गरेकाले पनि बैंकहरूको प्रोभिजनमा फरक देखिएको बताउँछन् । केही बैंकले उक्त वयवस्था अनुसार प्रोभिजन गरेका छन् भने केही बैंकले पुरानै व्यवस्था अनुसार गरेका  छन् । बैंकहरूले व्यवसाय विस्तार गरेर भन्दा पनि राष्ट्र बैंकले लिएको लचिलो नीतिले गर्दा यसपालि नाफामा वृद्धि देखिएको कोइरालाले बताए ।

प्रतिफलमा संयुक्त लगानीका बैंक उत्कृष्ट

नाफामा सुधार हुँदा संयुक्त लगानीका तीन बैंक प्रतिफलका हिसाबले आकर्षक बैंकका रूपमा देखिएका छन् ।

उनीहरूको प्रकाशित वित्तीय विवरण अनुसार स्ट्यान्डर्ड चार्टर्डको प्रतिसेयर आम्दानी सर्वाधिक ३६ रुपैयाँ ५७ पैसा हुँदा एभरेस्टको ३४ रुपैयाँ ८५ पैसा छ । गत आवको नाफाबाट १० प्रतिशत बोनस सेयर समायोजनपछि पनि बैंकको प्रतिसेयर आम्दानी करिब ३५ रुपैयाँ पुगेको हो ।

यस्तै नेपाल एसबीआईको प्रतिसेयर आम्दानी ३१ रुपैयाँ ३ पैसा, नबिल २९ रुपैयाँ ९६ पैसा, प्राइम कमर्सियल २६ रुपैयाँ ५३ पैसा र एनएमबीको २४ रुपैयाँ ९५ पैसा छ ।

– यस समाचारको श्रोत : Online Khabar हो ।