सधैं दशैंपछि गुल्मी प्रशासनमा सेवाग्राहीको चाप, सेवाप्रवाहमा समस्या

८ कात्तिक, गुल्मी । दशैं सकिएसँगै जिल्ला प्रशासन कार्यालय, गुल्मीमा सेवाग्राहीको भीड बढेको छ । दशैंपछि प्रशासन कार्यालयमा नागरिकता, राहदानी र राष्ट्रिय परिचयपत्र बनाउनेको चाप बढेको हो ।

दशैं तिहार मनाउन घर आएकाहरुले त्यही मौका पारेर सरकारी कार्यालयबाट सेवा लिने भएकाले प्रशासन कार्यालयमा सेवाग्राहीको अत्यधिक चाप बढेको हो । भीड बढेपछि व्यवस्थापन गर्न थप समस्या भएको जिल्ला प्रशासन कार्यालय गुल्मीले जनाएको छ ।

प्रशासनको क्षमता भन्दा बढी सेवाग्रही आउदा लाइन र सेवा लिन कुर्ने ठाउँ पनि अस्तव्यस्त बन्ने गरेको छ । प्रशासन कार्यालयमा सेवाग्राहीको भीड बढेपछि बिहान १० बजेदेखी राति ९ बजेसम्म अतिरिक्त समयमा नागरिकलाई सेवा दिएको सहायक प्रमुख जिल्ला अधिकारी हरिप्रसाद गैरेले बताए ।

भीड व्यवस्थापनका निम्ति प्रशासन कार्यालयले राहदानी र राष्ट्रिय परिचयपत्रमा टोकन प्रणाली समेत जारी गरेको छ । तर, पनि सेवाग्राही तँछाडमछाड गरेरै लाइनमा बस्ने गर्नाले भीड व्यवस्थापन चुनौतीपूर्ण बन्ने गरेको छ ।

दशंैपछि प्रशासन कार्यालयमा दिनमा नयाँ नागरिकता १६०, प्रतिलिपि ७०, राहदानी सिफारिस १००, राहदानी वितरण ९३, राष्ट्रिय परिचयपत्र १५९ र राष्ट्रिय परिचय पत्रकार्ड वितरण ९५ हुने गरेको सहायक प्रमुख जिल्ला अधिकारी गैरेले बताए ।

प्रशासन कार्यालयले सरदर ५० देखि ८० जनासम्मलाई सेवा प्रवाह गर्नसक्ने क्षमता रहेको छ । तर सेवाग्रहीको चापले अहिले दोब्बरले सेवा लिन गरेका छन् । जसले गर्दा कर्मचारीहरु छिटो सेवा दिन खोज्दा भाषा र लेखाइमा समस्या हुने गरेको सहायक प्रमुख जिल्ला अधिकारी गैरेले बताए ।

मुसिकोट नगरपालिका–७ बाट प्रशासन कार्यालय गुल्मीमा आएका प्रकाश काफ्ले सेवाग्राहीले लाइन व्यवस्थापन राम्रो नभएको गुनासो गरे । लाइन व्यवस्थापन नहुँदा सेवा लिन निकै समस्या झेल्नु परेको उनले बताए ।

प्रशासन कार्यालयमा महिला पुरुष सबैको लाइन एउटै हुँदा सेवाग्रहीले निकै सकसपूर्ण अवस्थामा सेवा लिनु परेको सेवाग्रहीको गुनासो छ । प्रशासन कार्यालयले भीड व्यवस्थापन गर्न टोकन प्रणाली सुरु गरेको छ । त्यसले गर्दा पनि केही हदसम्म सेवाग्राहीलाई समेत सहज भएको छ ।

– यस समाचारको श्रोत : Online Khabar हो ।