ब्याज आम्दानी बढेसँगै हिमालयन लघुवित्तको नाफा १२ गुणा बढ्यो

९ कात्तिक, काठमाडौं । हिमालयन लघुवित्तको नाफा १२.४ गुणाले बढेको छ । कम्पनीले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार कम्पनीको खुद नाफा १ करोड ३४ लाख ९९ हजार रुपैयाँ छ । गत आर्थिक वर्षको यसै अवधिमा कम्पनीको खुद नाफा जम्मा १० लाख ८ हजार थियो ।

खुद ब्याज आम्दानी बढ्नु, इम्पेरिमेन्ट चार्ज (लोन लस प्रोभिजन) घट्दा नाफामा उच्च वृद्धि देखिएको हो । गत आवको पहिलो त्रैमासमा कम्पनीको खुद ब्याज आम्दानी ५ करोड ५३ लाख रुपैयाँ रहेकोमा यो आवको पहिलो त्रैमासमा ७ करोड २० लाख रुपैयाँ पुगेको छ ।

इम्पेरिमेन्ट चार्ज पहिले ६३ लाख रुपैयाँ रहेकोमा अहिले ११ लाखमा झरेको छ । कम्पनीको वार्षिक प्रतिसेयर आम्दानी १६ रुपैयाँ ८८ पैसा छ । कुल कर्जामा निष्क्रिय कर्जाको अंश बढेको छ । यस्तो कर्जा गत वर्षको असोज मसान्तसम्म २.९२ प्रतिशत रहेकोमा यो असोज मसान्तसम्म ३.७२ प्रतिशत छ । लघुवित्तको आधार दर एक वर्षमा १९.०८ बाट १५.६८ प्रतिशतमा झरेको छ ।

असोज मसान्तसम्म कुल वितरणयोग्य नाफा ८९ लाख ९२ हजार ऋणात्मक छ । कम्पनीको प्रतिसेयर नेटवर्थ १२२ रुपैयाँ ३१ पैसा छ । बिहीबार बजार बन्द हुँदा सेयर मूल्य प्रतिकित्ता ९९४ रुपैयाँ छ ।

– यस समाचारको श्रोत : Online Khabar हो ।