कोप-२९मा ५० बढी सरकारी अधिकारी जाँदै, वनकै ३० भन्दा बढी

२५ कात्तिक, काठमाडौं। अजरबैजानको बाकुमा भोलि सोमबारदेखि सुरु हुने जलवायु परिवर्तन सम्बन्धी संयुक्त राष्ट्रसंघीय निकायको २९औं सम्मेलन (कोप-२९)मा सहभागी हुन वन मन्त्रालय र अन्तर्गत निकायका मात्रै ३० भन्दा बढी कर्मचारी जाने भएका छन् ।

११ नोभेम्बरदेखि २२ नोभेम्बरसम्म हुने सम्मेलनका विभिन्न शत्रहरुमा सहभागी हुन ठूलो संख्यामा सरकारी पदाधिकारी र कर्मचारीहरु जान लागेका हुन्। आयोजकले वन मन्त्रालयका लागि ३ जनाको खर्च ब्यहोर्ने गरी निम्तो पठाएको थियो । तर, वन तथा वातावरण मन्त्रालय नै लगभग रित्तो बनाएर मन्त्री, मन्त्रीका सचिवालय र महाशाखा तथा शाखा र विभिन्न विभागका कर्मचारीहरु बाकु जान लागेका छन् ।

वन मन्बी ऐनबहादुर शाहीसहित वन सचिव दीपकप्रसाद खराल, सहसचिवहरु सिन्धुप्रसाद ढुंगाना, भुपाल बराल, महेश्वर ढकाल, बुद्धि सागर पौडेल, सञ्जीवकुमार राई, नवराज पुडासैनी र धनञ्जय लामिछाने पनि बाकु जाँदैछन्। यसमध्ये केही यसअघि नै बाकु पुगिसकेका छन् । वन राज्यमन्त्री रुपा विक पनि बाकु जाने तयारीमा छिन् ।

उपसचिवहरु शोभाकर रेग्मी, दीपक अधिकारी, महेन्द्रप्रसाद शांखी, राजु सापकोटा, शिव खनाल, हरिप्रसाद शर्मा, नरेश शर्मा, प्रकाशसिंह थापा, सुमन सुवेदी, प्रकाश थापा र दीपा वली पनि मनोनयनमा परिसकेका छन् ।

अधिकृतहरु प्रकाश लामिछाने, हिमाल शिवाकोटी, हेमराज शाही, जनराज शाही, खेमराज काफ्ले, अमृत शर्मा, नारायण रायमाझी, नारायणप्रसाद पोखरेल, शिला ज्ञवाली, गंगा पाण्डे, र स्मृति रेग्मी पनि टोलीमा छन् ।

वन तथा वातावरणबाहेक ऊर्जा जलस्रोत तथा सिँचाइ, शहरी विकास, कृषि तथा पशुपन्छी विकास, स्वास्थ्य लगायतका मन्त्रालयका अधिकारीहरु पनि कोपमा सहभागी हुन बाकु जाँदैछन् । आइतबार राष्ट्रपति रामचन्द्र पौडेल ९ सदस्यीय टोलीको नेतृत्व गर्दै बाकुमा लागि प्रस्थान गरिसकेका छन् । यसरी सम्मेलनमा ५० भन्दा बढी सरकारी पदाधिकारी सहभागी हुने सार्वजनिक भइसकेको छ ।

वन तथा वातावरण मन्त्रालयका प्रवक्ता बद्रीप्रसाद ढुंगाना कोपमा गत वर्ष पनि नेपालबाट ठूलो संख्यामा कोपमा सहभागी भएको बताउँछन् । नेपाल कोपमा धेरै सहभागी जाने सूचीमा अगिाडि नै पर्ने उनले बताए । कोप सम्मेलनको आधिकारिक वेबपेजमै यसबारेको कुन ठाउँबाट कति सहभागी भन्ने जानकारी भेटिने उनले बताए ।

‘धेरैले कोपमा जान खोज्ने र दातृ निकायले पनि खर्च दिने अवस्था रहेछ,’ उनले भने,‘यसमा सांसददेखि विद्यार्थी, आयोगदेखि मन्त्रालयसम्मका मान्छे जान खोज्ने हुन्छ । त्यसैले टोली ठूलै हुने देखिन्छ ।’ उनका अनुसार कोपमा गैरसकारी संस्थाका प्रतिनिधि, सरकारी पदाधिकारीहरु र पत्रकारहरु बढी जाने गरेका छन् ।

प्रवक्ता ढुंगानाले देशको आर्थिक हैसियतका आधारमा हेर्दा गर्दा नेपालबाट केही बढी नै संख्यमा सहभागी जाने गरेको देखिएको बताए । समृद्ध राष्ट्रबाट समेत यति धेरै व्यक्ति नजाने गरेको र जानेहरुले पनि लामो समय तयारी गर्ने गरेको असल अभ्यास नेपालमा भने नभएको बताए ।

‘स्पष्ट रुपमा भन्दा अहिले पनि आफ्नो नाम कसैले मनोनयन गर्देला कि भनेर च्याँखे थापेर बस्नेहरु छन्,’ उनले भने,‘ हामीकहाँजसले पायो त्यही जाने हुँदैछ, कोही कसैको भिसा आइपुग्दा पनि टिकट कसले किनिदिने भन्ने अन्योल हुन्छ ।’

विभिन्न दातृ निकायसँग सहयोग मागेर यस्तो सम्मेलनमा भाग लिने गरिएको उनले बताए ।

– यस समाचारको श्रोत : Online Khabar हो ।