साहस ऊर्जा : आम्दानी घट्दा पनि १६ प्रतिशत बढ्यो नाफा

२६ कात्तिक, काठमाडौं । साहस ऊर्जाको खुद नाफा १६ प्रतिशत बढेको छ । कम्पनीले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार खुद नाफा ४० करोड २ लाख रुपैयाँ छ । गत आर्थिक वर्षको यसै अवधिमा यस्तो नाफा ३४ करोड ४८ लाख रुपैयाँ थियो ।

विद्युत् बिक्री आम्दानी घट्दा पनि नाफा बढेको छ । यसको प्रमुख कारण वित्तीय लागत घट्नु हो । विद्युत् बिक्री आम्दानी पहिले ८९ करोड ३३ लाख रुपैयाँ रहेकोमा अहिले ८६ करोड ७१ लाख रुपैयाँ छ ।

वित्तीय लागत पहिले ३२ करोड ८९ लाख रुपैयाँ रहेकोमा अहिले २३ करोड ४० लाख रुपैयाँमा झरेको छ । जसले गर्दा कम्पनीको नाफामा उल्लेख्य योगदान पुग्यो ।

कम्पनीको वार्षिक प्रतिसेयर आम्दानी ४५ रुपैयाँ ७४ पैसा छ । प्रतिसेयर नेटवर्थ १८४ रुपैयाँ ८९ पैसा छ । कम्पनीले सोलुखुम्बु जिल्लामा ८६ मेगावाटको दुधकोशी जलविद्युत् आयोजना सञ्चालन गरिरहेको छ । आइतबार बजार बन्द हुँदा यस कम्पनीको सेयर मूल्य प्रतिकित्ता ५५५ रुपैयाँ छ ।

– यस समाचारको श्रोत : Online Khabar हो ।