सिड्नीमा हुने ‘नेपाल फेस्टिभल’मा हेमन्त शर्मा र आस्था राउत गुञ्जिने

सिड्नी । अस्ट्रेलियाको सिड्नीमा ‘नेपाल महोत्सव’ हुने भएको छ । गैरआवासीय नेपाली संघ अस्ट्रेलियाले २३ नोभेम्बरका दिन डार्लिङ हार्बरस्थित टुम्वोलोङ पार्कमा महोत्सव आयोजना गर्ने भएको हो ।

महोत्सव बिहान १० बजेबाट राति १० बजेसम्म चल्ने आयोजकले जनाएको छ । ‘नेपाल फेस्टिभल-२०२४’ मा प्रमुख अतिथिको रुपमा न्यु साउथवेल्स राज्यका प्रिमियर क्रिस मिन्स सहभागी हुने भएका छन् । नेपाल फेस्टिभलमा पहिलो पटक राज्यका प्रिमियर अतिथिको रुपमा सहभागी हुन लागेका हुन् ।

महोत्सवमा गायक हेमन्त शर्मा, गायिका आस्था राउत र दी एक्स ब्यान्डले सांगीतिक प्रस्तुति दिनेछन् । ३० हजारभन्दा बढी दर्शकले सहभागिता जनाउने अपेक्षा गरिएको नेपाल फेस्टिभलको दिन बिहान कल्चरल परेड समेत हुने एनआरएनए अस्ट्रेलियाले जनाएको छ ।

नेपाली खाना, संस्कृति र परम्पराको प्रदर्शनी र प्रवर्द्धन गर्ने मुख्य उद्देश्यले हरेक दुई वर्षमा अस्ट्रेलियाका आठवटै राज्यमा ‘नेपाल फेस्टिभल’ गर्दै आएको एनआरएनए अस्ट्रेलियाले जनाएको छ ।

– यस समाचारको श्रोत : Online Khabar हो ।