अन्तर्राष्ट्रिय हवाई टिकट मूल्यवृद्धिको मारमा वैदेशिक रोजगारीमा जाने नेपाली
२७ कात्तिक, काठमाडौं । अन्तर्राष्ट्रिय वायुसेवा कम्पनी र ट्राभल कम्पनीबीच ‘मिलेमतो’ मा कृत्रिम अभाव सिर्जना गरी बढाइएको हवाई भाडाको मारमा वैदेशिक रोजगारीमा जाने नेपाली परेका छन् ।
त्यतिमात्र होइन, स्वदेशमा टिकट नपाउने अवस्थामा छिमेकी मुलुकको विमानस्थल प्रयोग गर्नुपर्ने बाध्यता समेत सिर्जना भएको छ ।
नेपाल वैदेशिक रोजगार व्यवसायी संघका अनुसार अहिले वैदेशिक रोजगारीमा जाने श्रमिक महँगो हवाई टिकटको मूल्य तिर्न बाध्य भएका छन् ।
संघका अनुसार सामान्य दिनमा ३० देखि ३५ हजार रुपैयाँमा नियमित पाउने टिकटको मूल्य अहिले ७० हजार देखि ८० हजार रुपैयाँसम्म पुर्याइएको छ ।
संघका अनुसार अहिले नेपालबाट दैनिक १ हजार ५ सय हाराहारी श्रमिक वैदेशिक रोजगारीका लागि उड्ने गर्छन् । सीमित एयरलाइन्सको मिलेमतोमा ट्राभल एजेन्सीले कृत्रिम अभाव खडा गरेको र यसले टिकटको मूल्य आकासिएको संघको भनाइ छ ।
यसरी हवाई भाडा महँगो हुँदा विदेशी मुद्रा विदेशिने भन्दै संघले चिन्ता व्यक्त गरेको छ । अर्कातर्फ, नेपाली श्रमिकलाई विदेश जान भारत सहित मुलुकको शरण पर्नुपर्ने अवस्था आएको छ ।
संघका अनुसार अहिले भारत, बंगलादेश सहित मुलुकबाट खाडी मुलुकमा जान नेपालको तुलनामा आधा कम पर्ने देखिएको छ ।
उता, नेपाल नागरिक उड्डयन प्राधिकरणका अनुसार यस्तो समस्या श्रमिक बढी यात्रा गर्ने मुलुकमै देखिएपछि वायुसेवा कम्पनीहरूलाई सचेत गराइएको जनाएको छ ।
प्राधिकरणका सूचना अधिकारी ज्ञानेन्द्र भूलका अनुसार प्राधिकरणसँग ट्राभल कम्पनीलाई नियमन गर्ने अधिकार छैन । साथै, अन्तर्राष्ट्रिय वायुसेवा कम्पनीलाई सिधै कारबाही समेत गर्न मिल्दैन ।
अन्तराष्ट्रिय सम्झौता अनुसार स्वदेशी वायुसेवा कम्पनीसँग मेल खाने गरी स्वतन्त्र रूपमा मूल्य निर्धारण गर्ने गरी छाडिएको हुन्छ । यस्तो अवस्थामा अन्तर्राष्ट्रिय वायुसेवा कम्पनीले बढी मूल्य लिए सम्झौता अनुसार सचेत गराउने जिम्मेवारी प्राधिकरणको हो ।
अर्कातर्फ, सम्बन्धित मुलुकको प्राधिकरणलाई पत्र लेखेर वायुसेवा कम्पनीले गरेको गल्तीबारे जानकारी गराउने जिम्मेवारी समेत प्राधिकरणको हो ।
भूलका अनुसार गत शनिबार प्राधिकरणले वायुसेवा कम्पनीहरूलाई बोलाएर सचेत गराएपछि मूल्य र टिकट उपलब्धतामा केही सुधार देखिएको छ । यो अवस्था सहज हुन भने नोभेम्बरसम्मै लाग्ने देखिएको छ ।
‘काठमाडौंमा अधिकतम जहाज उडाउने प्रयास गरेका छौं,’ उनले भने, ‘अब भैरहवामा पनि डिमान्ड बढ्ला, नोभेम्बरपछि सामान्य हुने अपेक्षा छ ।’
– यस समाचारको श्रोत : Online Khabar हो ।