अवैध संरचनामा इटहरी उपमहानगरको डोजर
१३ चैत, विराटनगर । खोला र पैनी मिचेर बनाइएका अवैध संरचनामा इटहरी उपमहानगरपालिकाले डोजर चलाएको छ ।
खोला र पैनीको जग्गा मिचेर निर्माण भएका संरचना हटाउन यसअघि उपमहानगरले सूचना जारी गरेको थियो । नहटाएपछि मंगलबारबाट डोजर चलाउन सुरु गरेको हो ।
इटहरीस्थित टेंग्रा खोलाको सिरानबाट खोला अतिक्रमण गरेर निर्माण भएका संरचना हटाउन सुरु गरेको उपमहानगरपालिका प्रमुख हेमकर्ण पौडेलले जानकारी दिए । अतिक्रमण गर्नेले नै संरचना नहटाएपछि उपमहानगर आफैले भत्काउन सुरु गरेको उनले बताए ।
टेंग्रा खोला, खेती खोला र सुकुमारी पैनीको दुवै किनारबाट ६– ६ मिटर छाडेर भवन संरचना बनाउनुपर्ने कानुनलाई आधार मानिएको उनले बताए । खोला पैनीको दुवैतर्फ ६– ६ मिटर नछोडिकन बनेका संरचना भत्काउन थालिएको उनकाे भनाई छ ।
बर्खाको बेला सामान्य पानी पर्दा पनि इटहरी डुबानमा पर्ने गरेको छ। पैनी र खोलाको क्षेत्र अतिक्रमण गरेका कारण परेको पानीको निकास ढिलो हुन्छ । बर्खामा इटहरीमा खोलाको तटीय वस्तीमा बस्नेलाई जोगाउनका लागि अवैध संरचना हटाउन थालिएको पौडेलले बताए ।
इटहरी उपमहानगरपालिका भित्र २० वटा वडा रहेका छन्। तीमध्ये ३, ४, ९, १०, ११ र १२ नम्बर वडा बाढीबाट धेरै प्रभावित हुन्छ ।
– यस समाचारको श्रोत : Online Khabar हो ।