आसिफ इलाइटको ब्राण्ड एम्बासडर, टमाटालाई सम्मान
२८ असार, काठमाडौं । नेपाली क्रिकेट टोलीका ओपनर आसिफ शेख इलाइट मुभर्स एजुकेसन कन्सल्टन्सीको ब्राण्ड एम्बासडरमा नियुक्त भएका छन् ।
शुक्रबार एक कार्यक्रमबीच इलाइटले आसिफलाई ब्राण्ड एम्बासडरमा नियुक्त गरेको हो । आसिफ शेख र इलाइटका अध्यक्ष उद्व वनबीच दुई वर्षलाई सम्झौता भएको छ । सम्झौताको रकम खुलाइएको छैन । यसले आफूलाई हौसला प्रदान गर्ने आसिफले बताए ।
‘पक्कै पनि एउटा क्रिकेटरलाई निजी क्षेत्रको साथ चाहिन्छ । यसले मलाई हौसला दिनुको साथै क्रिकेट खेल्न सजिलो बनाउँछ’, आसिफले सम्झौपछि भने ।
इलाइटका अध्यक्ष वनले खेलाडीहरुको शीर उच्च राख्न आसिफलाई ब्राण्ड एम्बासडरमा नियुक्त गर्ने निर्णय लिएको बताए । ‘आसिफ बिग म्याच प्लेयर हुन् । टी–२० विश्वकप २०२४ मा होईन यू–१९ देखिनै राम्रोसँग चिन्दै आएको छु । उनको क्षमता विकासमा केही योगदान र शीर उच्च राख्न सहयोग पुग्नेछ’, वनले भने ।
विकेटकिपर तथा ओपनर आसिफ शेख २०२१ देखि नेपालको टोलीमा निरन्तर खेल्दै आएका छन् । नेपालको ओडीआई मान्यता बचाउन, एसिया कप र टी–२० विश्वकपमा पुर्याउन आसिफको योगदान महत्वपूर्ण छ । त्यस्तै इलाइटले नेपाली क्रिकेटमा खेलाडी र प्रशिक्षकको रुपमा पुर्याएको योगदानको उच्च कदर गर्दै जगत टमाटालाई पनि सम्मान गरेको छ ।
नेपालको सिनियर, यू–१९ र महिला टोली सम्हालिसकेका उनलाई सम्मान गरेको हो । नेपालले उनको मुख्य प्रशिक्षकमा २०१८ मा ओडीआई मान्यता पाएको थियो ।
‘पैसा सबै कुरा होइन । यस्तो सम्मानले मलाई हौसला दिन्छ । अहिले मैले युवा जस्तो महसुस गरेको छु । ऊर्जा थपेको छ’, सम्मानको क्रममा टमाटाले भने ।
– यस समाचारको श्रोत : Online Khabar हो ।