उन्नति सहकारीमा सांसद पुत्रको बदमासी, सवा करोड अनियमितता

१३ कात्तिक, विराटनगर । सांसद पुत्रले बदमासी गर्दा झापाको शिवसताक्षी नगरपालिकामा रहेको  एक सहकारी संकटमा परेको छ ।

सुमन खनाल अध्यक्ष रहेको शिवसताक्षी नगरपालिका ३ मा रहेको उन्नति वचत तथा ऋण सहकारी संस्था संकटमा परेको हो । खनाल झापाको क्षेत्र नम्बर ४ (१) बाट निर्वाचित एमाले प्रदेश सांसद राधाकृष्ण खनालका छोरा हुन् ।

सुमनको अग्रसरतामा २०६६ सालमा खुलेको यो सहकारीमा स्थापनाकालदेखि उनी आफैं अध्यक्ष छन् । सहकारीको रकम हिनामिना गर्दा नक्कली ऋणी पनि खडा गरेर ऋण लगानी गरेको देखिएको थियो ।

आर्थिक वर्ष २०७८/७९ मा रमेश अधिकारीको नाममा १ लाख ९१ हजार ८४९ रुपैयाँको कर्जा लगानी गरेको भएको देखाइएको थियो । तर सो ऋण नै नक्कली रहेको पालिकाले गठन गरेको छानबिन समितिले पत्ता लगाएको थियो ।

उन्नतिमा सर्वसाधारणको एक करोड ३८ लाख भन्दा बढी बचत अपचलन भएको छ । सर्वसाधारणको बचत अपचलन गरेको आरोपमा पक्राउ परेका अध्यक्ष खनाल गत ५ कात्तिकदेखि प्रहरी हिरासतमा छन् । प्रहरीले सो सहकारीका व्यवस्थापक मित्रलाल भट्टराईलाई पनि पक्राउ गरेको छ ।

प्रहरी स्रोतका अनुसार यो सहकारीको वचत अपचलनमा अध्यक्ष खनाल र व्यवस्थापक मित्रलाल भट्टराईको मिलेमतो छ । भट्टराई पूर्वनेपाल बहुद्देश्यीय सहकारी संस्थाबाट रकम हिनामिना आरोपमा कारबाहीमा परेका व्यक्ति हुन् । पूर्वनेपालबाट निकालिएपछि उनी उन्नतिमा पुगेका थिए ।

जिल्ला प्रहरी कार्यालय झापाका प्रवक्ता प्रहरी नायव उपरीक्षक कृष्णकुमार चन्दका अनुसार सहकारीका व्यवस्थापक भट्टराई सोमबार झिलझिलेबाट पक्राउ परेका परेका हुन् ।

जिल्ला प्रहरी कार्यालयमा ३७ जनाले बचत फिर्ताको मागसहित उजुरी दिएका छन् । यो संख्या बढ्दो छ ।

गत वर्ष सहकारीमा ठगी भएको उजुरी परेपछि शिवसताक्षी नगरपालिकाले छानबिन गरेको थियो । छानबिनका क्रममा अध्यक्ष खनालले आर्थिक वर्ष २०७८/०७९ मा ७० हजार शेयर रकम हिनामिना गरेको देखिएको थियो ।

भौचर बिना बचतकर्ताको रकम २ लाख ६ हजार ८६८ रुपैयाँ अध्यक्षले नै निकाले, बचतको ४२ लाख नगद हिनामिना गरेको छानबिनका क्रममा देखिएको थियो ।

उन्नति फण्ड एकाउन्टबाट आर्थिक वर्ष २०७९/८० मा २ लाख ३६ हजार ८४० रुपैयाँ निकालेर अध्यक्ष खनालले आफ्नो खातामा हालेका थिए ।

आर्थिक वर्ष २०७७/०७८ मा पाँच लाख ४९ हजार रुपैयाँ आफैंले चलाएका थिए, लेखापरीक्षण प्रतिवेदनमा संस्थाले लगानी गरेको रकम भन्दा ५ लाख ४९ हजार ५१२ रुपैयाँ बढी देखिएको थियो ।

अध्यक्षले आर्थिक वर्ष २०७८/७९ सम्म ४४ लाख ३४ हजार १६७ र आर्थिक वर्ष २०७९/८० मा १६ लाख ३१ हजार ३८७ रुपैयाँ गरी ६० लाख ६६ हजार १९६ हिनामिना गरेको प्रतिवेदनमा उल्लेख छ ।

‘उल्लेखित कैफियतहरुलाई समावेश गर्दा संस्थाको अध्यक्षबाट आर्थिक वर्ष २०७८/७९ को अन्त्यमा १ करोड ४४ लाख ८० हजार ३९४ रुपैयाँ पाउनु पर्ने देखिन्छ । साथै आर्थिक वर्ष २०७९/८० को अन्त्यमा १ करोड ६२ लाख ६२ हजार ३६९ रुपैयाँ पाउनु पर्ने देखिन्छ’, प्रतिवेदनमा भनिएको छ ।

प्रतिवेदनमा उल्लेख भएको विवरण अनुसार खनालको शेयर खातामा १ लाख १० हजार छ । बचत खातामा थप २३ लाख २२ हजार ५९९ रुपैयाँ गरी जम्मा २४ लाख २५ हजार ५९९ रुपैयाँ सहकारीमा देखिन्छ । उनीबाट थप १ करोड ३८ लाख असुल गर्नुपर्ने देखाइएको थियो ।

छानबिन समितिको प्रतिवेदन दिएपछि २०८० फागुन २४ गते वडा कार्यालयमा अध्यक्ष खनालले दुई महिनाभित्र मिलाउने कागज गरेका थिए । तर समय गुज्रिँदा पनि उनले समस्या समाधान गर्न चासो नदिएपछि प्रहरीले पक्राउ गरेको हो ।

छोरोको बदमासी रहेछ : सांसद खनाल

कोशी प्रदेश सांसद राधाकृष्ण खनाल सहकारीको बचत अपचलनमा आफ्नो छोरा सुमनको बदमासी रहेको बताउँछन् । सहकारीको समस्या समाधानका लागि आफूले पनि पहल गरेको बताउँदै उनले सहकारीमा छोरासहित अन्य सञ्चालकको पनि बदमासी रहेको बताएका हुन् ।

राधाकृष्ण सो सहकारीमा आबद्ध छैनन् । ‘त्यो सहकारीमा मेरो छोरा थियो, सधैभरि बढेका छोराले के गर्छन्, कसो गर्छन् त्यो सबै थाहा पनि हुँदैन’, उनले भने, ‘सहकारीको कुरा उठेपछि हेर्दा अलिअलि बदमासी मेरो छोराको पनि छ ।’

छोराले सहकारी राम्ररी सञ्चालन गरेको भए यस्तो समस्या नआउने उनको भनाइ छ । एक पटक आफूले समस्या समाधन गर्न पहल गरेको बताउँदै उनले सहकारीमा अन्य व्यक्तिले पनि बदमासी गरेका कारण प्रशासनले निष्पक्ष अनुसन्धान गर्नुपर्ने बताए ।

– यस समाचारको श्रोत : Online Khabar हो ।