खाद्य प्रविधि कार्यालय जनकपुरले गर्यो वीरगञ्जका होटल वर्गीकरण
६ मंसिर, काठमाडौं । खाद्य प्रविधि तथा गुण नियन्त्रण कार्यालय जनकपुरले वीरगञ्जका होटलहरूको वर्गीकरणसँगै लोगो नवीकरण सुरु गरेको छ ।
कार्यालयले ती होटलका भान्सा सरसफाइ , खाद्यजन्य पदार्थ भण्डारण विधि, कोल्डचेन प्रविधि लगायत अनुगमन गरी खाद्य स्वच्छता स्तरका आधारमा विभिन्न स्तर निर्धारण अनुसार वर्गीकरण थालेको हो ।
कार्यालयको संयोजन एवं खाद्य प्रविधि तथा गुण नियन्त्रण विभाग वीरगञ्जका खाद्य अनुसन्धान अधिकृत सुरेशकुमार सिंहको नेतृत्वको टोलीले १० होटल अनुगमन गरेको थियो ।
अनुगमन क्रममा सबै होटलका भान्सा , भण्डारण गरिएको खाद्यजन्य वस्तु जाँचका साथै टेस्टो मिटरद्वारा भन्सामा प्रयोग गरिएका तेलको कोलारिटी समेत जाँच गरिएको खाद्य अनुसन्धान अधिकृत सिंहले बताए ।
तीमध्ये सरोबर प्रोटिक होटल , होटल दियालो र भिस्वा होटल गरी तीन वटालाई खाद्य स्वच्छताका आधारमा अतिउत्तम (चार तारे) प्रमाणीकरण गरी लोगो वितराण गरिएको अनुगमन टोली सदस्य एवं होटल तथा पर्यटन व्यवसायी संघ पर्साका अध्यक्ष हरि पन्तले बताए ।
पन्तले लोगो वितरणमा पक्षपात हुन नदिएको बताए । उनले वीरगञ्जका सबै होटललाई खाद्य स्वच्छता अभियानमा सहभागी भई उपभोक्तालाई स्वच्छ र स्वस्थ खानेकुरा पस्कन अनुरोध गरे ।
अनुगमन टोलीले खाद्य स्वच्छताका आधारमा होटल पूजन ,होटल मकालु र अनमोल स्वीटलाई उत्तममा वर्गीकरण गरी दुई तारेको लोगो दिएको छ । त्यसैगरी कन्ट्री इन होटल, कैलाश होटल र मेजवान होटललाई १ तारेको लोगो तथा डिलाइट गो रेस्टुरेन्टलाई सामान्यको संकेत दिएर केही सुधारको निर्देशन दिइएको छ ।
सोही क्रममा अनुगमन टोलीले होटल सञ्चालकलाई खाद्य स्वच्छता प्रतिबद्धतापत्रमा हस्ताक्षर गराएको थियो ।
अनुगमन टोलीमा वाणिज्य कार्यालय वीरगञ्जका सुनिल चौरसिया, वीरगञ्ज उद्योग वाणिज्य संघका मनोज कुमार दास, वीरगञ्ज महानगरका बिभा मिश्र, जिल्ला प्रशासन कार्यालय पर्सा र जिल्ला प्रहरी कार्यालयका प्रतिनिधि सहभागी थिए ।
– यस समाचारको श्रोत : Online Khabar हो ।