दुई पटक अग्रता जोगाउन नसक्दा संकटा एनआरटीसँग बराबरीमा रोकियो
१३ साउन, काठमाडौं । ललित स्मृति एन्फा यू-१८ युथ लिगमा संकटा क्लबले एनआरटीसँग २-२ को बराबरी खेलेको छ ।
सातदोबाटोस्थित एन्फा कम्प्लेक्सको मैदानमा आइतबार भएको खेलमा संकटाले दुई पटक अग्रता लिएपनि जोगाउन नसक्दा पहिलो जितबाट बञ्चित भयो ।
खेलको पाँचौं मिनेटमै कृष्ण आले मगरले गोल गर्दै संकटालाई अग्रता दिलाएका थिए । तर त्यो अग्रता लामो समय टिकेन । एनआरटीका लागि कप्तान विज्ञान खड्काले १३ औं मिनेटमा बराबरी गोल फर्काए ।
त्यसपछि अनिश थापा मगरले २६ औं मिनेटमा गोल गर्दै संकटालाई पुन: अग्रता दिलाएका थिए । पहिलो हाफमा संकटाले उक्त अग्रता कायम राखेपनि दोस्रो हाफमा जोगाउन सकेन ।
एनआरटीका सन्तोष गोङ्बाले ६७ औं मिनेटमा गोल गर्दै खेल २-२ को अवस्थामा पुर्याए । त्यसपछि भने खेलमा दुवैतर्फबाट गोल हुन सकेन र दुवैले एक-एक बाँडे ।
पाँच खेलमा संकटाको यो तेस्रो बराबरी हो । तीन बराबरी र दुई हारबाट ३ अंक जोडेको संकटा दशौं स्थानमा उक्लेको छ ।
पहिलो बराबरी खेलेको एनआरटीले ५ खेलबाट १० अंक जोडेर दोस्रो स्थानमा उक्लेको छ ।
– यस समाचारको श्रोत : Online Khabar हो ।