नयाँ पिरियड-ड्रामा फिल्ममा सन्तोष सेन र अनमोल केसीले सहकार्य गर्ने
काठमाडौं । सन्तोष सेनले निर्माण तथा निर्देशन गर्न लागेको पिरियड ड्रामा फिल्मका लागि अभिनेता अनमोल केसी कास्ट हुने लगभग टुंगो लागेको छ । अनलाइनखबरसँग कुरा गर्दै सन्तोष र अनमोल दुवैले यो फिल्म गर्नको लागि आफूहरुबीच ‘अन्डरस्ट्यान्डिङ’ भएको बताए ।
केही दिनअघिको मिटिङमा सहकार्यबारे लगभग निधो भएको सेनले अनलाइनखबरलाई जानकारी दिए । अनमोलले पनि अर्को वर्षदेखि प्रोजेक्ट गर्ने कुरा भएको पुष्टि गरे ।
‘लिखित सहमति र अनुबन्धन केही भएको छैन । तर आगामी एउटा पिरियड ड्रामा सहकार्य गर्नेबारे हाम्रो भद्र सहमति जुटेको छ,’ भेटबारे सेनले भने, ‘अनमोलजी हामीसँग काम गर्न पहिल्यैदेखि इच्छुक हुनुहुन्थ्यो । बलिदानपछि हामी त्यतातिर लाग्नेछौं ।’
अनमोलले पनि सन्तोषजस्ता राम्रा मेकरसँग काम गर्ने इच्छा भएको बताउँदै अर्को वर्षदेखि काम थाल्ने कुरा भएको बताए । ‘उहाँजस्ता राम्रा मेकरसँग काम गर्न म पनि इच्छुक छु । अर्को वर्ष गर्ने कुरा छ । त्यो टपिक्समा कुरा पनि भएको हो,’ अनमोलले भने ।
निर्देशक सेनले अनमोलबारे भने, ‘हामी जिरोबाटै काम गर्न तयार छौं । एउटा आइडियामा काम गर्ने कुरा भएको हो ।’
निर्माता तथा निर्देशक सेन ‘बलिदान’पछि यो पिरियड ड्रामा निर्माणमा अघि बढ्नेछन् । यो फिल्मले नेपाल र तिब्बतबीच १८५५ देखि १८५६ सम्म चलेको युद्धको कथा भन्छ । उक्त युद्धमा एक नेपाली सिपाहीले गरेको संघर्ष यसको कथा हो ।
उक्त युद्धपछि तत्कालीन प्रधानमन्त्री जंगबहादुर राणा र तिब्बतका प्रतिनिधि कालोन सात्र्रबीच तत्कालीन प्रधानमन्त्री निवास थापाथलीमा २४ मार्च १८५६ मा दशबुँदे शान्ति सम्झौता भएको थियो । नेपाली सिपाहीले यो युद्धमा बहादुरी प्रदर्शन गरेपछि नेपालले यो युद्ध जितेको थियो ।
सेनले असारदेखि छायांकन सुरु हुने फिल्म ‘बलिदान’पछि यो नयाँ फिल्मको निर्माण सुरु हुने बताए । ‘लेखकलाई अहिले आइडिया सेयर गर्ने काम भइरहेको छ । यसअघि पनि प्रेमगीत ४ मा पिरियड ड्रामामा काम गरेको अनुभवलाई अझै राम्रोसँग देखाउन मन छ । पहिलेका त्रुटिलाई पनि सच्याएर इतिहासको कथा देखाउने अवसर हो,’ सेनले भने ।
सेनले यो पिरियड ड्रामालाई डिजिटल माध्यमबाट भव्य तुल्याउन प्रयास हुने बताए ।
– यस समाचारको श्रोत : Online Khabar हो ।