निसांका बने श्रीलंकाबाट ओडीआईमा दोहोरो शतक हान्ने पहिलो खेलाडी
२६ माघ, काठमाडौं । ओपनर पाथुम निसांकाको ऐतिहासिक दोहोरो शतकमा श्रीलंकाले पहिलो ओडीआई खेलमा अफगानिस्तानलाई ३ सय ८२ रनको विशाल लक्ष्य दिएको छ ।
टस हारेर पहिला ब्याटिङको निम्तो पाएको श्रीलंकाले निर्धारित ५० ओभरमा ३ विकेट गुमाउँदै ३८१ रन बनायो ।
श्रीलंकाका पाथुम निसांका १३९ बलमा २० चौका र ८ छक्कासहित २१० रनमा नट आउट रहे । निसांका ओडिआईमा दोहोरो शतक हान्ने श्रीलंका पहिलो खेलाडी बनेका छन् ।
यसअघि सन् २००० मा सनाथ जयसूर्याले भारतविरुद्ध १८९ रन नै श्रीलंकाका ब्याटरको ओडिआईमा एकै खेलमा सर्वाधिक रन थियो । २०१३ मा भारतविरुद्ध उपुल थरंगाले १७४ रन बनाएका थिए ।
श्रीलंकालाई ओपनर पाथुम निसांका र अविष्का फ्रेनान्डोले २६.२ ओभरमा १८२ रनको दोहोरो शतकीय साझेदारी गर्दै विशाल योगफलको आधार तय गरेका थिए ।
फ्रेनान्डो ८८ बलमा ११ चौका र ३ छक्कासहित ८८ रन, कुशल मेन्डिस १६, सदिरा समाराविक्रमा ४४ र चरिथ असलंकाले ७ रन बनाए । अफगानिस्तानका फरिद अहमद २ र मोहम्मद नाबीले १ विकेट लिए ।
– यस समाचारको श्रोत : Online Khabar हो ।