नेपाल-पाकिस्तान मैत्रीपूर्ण टी-२० क्रिकेट सुरु
१९ फागुन, काठमाडौं । नेपाल पाकिस्तान मैत्रीपूर्ण टी-२० क्रिकेट प्रतियोगिताको नवौं संस्करण शनिबार सुरु भएको छ ।
प्रतियोगिताको नेपालका लागि पाकिस्तानी राजदूत अब्रार हसन हासमी, नेपाल क्रिकेट संघका पूर्वअध्यक्ष विनयराज पाण्डे र हिमालयन बैंकका नायब प्रमुख कार्यकारी अधिकृत उज्वलराज भण्डारीले उद्घाटन गरे ।
उद्घाटन समारोहलाई सम्बोधन गर्दै नेपाल क्रिकेट संघका पूर्वअध्यक्ष पाण्डे र हिमालयन बैंकका नायब प्रमुख कार्यकारी अधिकृत भण्डारीले सन् २०१४ देखि लगातार प्रतियोगिता आयोजना गरेकामा पाकिस्तानी दूतावासलाई धन्यवाद दिए । उनीहरुले खेलकुद र क्रिकेटले दुई देशका युवालाई एक ठाउँमा ल्याउने धारणा राखे ।
नेपालका लागि पाकिस्तानका राजदूत हासमीले क्रिकेट खेलकुद मात्र नभई मानिसहरुलाई एक ठाउँमा ल्याउने प्लेटफार्म पनि भएको बताए । यो प्रतियोगिताले आगामी दिनमा नेपाल र पाकिस्तानका युवाबीच मैत्रीपूर्ण सम्बन्ध विकास गर्ने उनको भनाइ छ ।
२७ फागुनसम्म चल्ने प्रतियोगितामा यो वर्ष १२ वटा क्रिकेट टिम सहभागी छन् ।
– यस समाचारको श्रोत : Online Khabar हो ।