‘पूर्णबहादुरको सारंगी’को गीत ‘रैयाँ चाँदीको’लाई युट्युवमा करोड पटक हेरियो
काठमाडौं । सर्वकालिन ब्लकबस्टर फिल्म ‘पूर्णबहादुरको सारंगी’ले एकातिर विश्वभर उछाल कमाइ गरिरहेको छ । फिल्मले तेस्रो सातासम्म नेपालमा ४० करोड र डायस्पोरामा १५ करोडभन्दा धेरै कमाइ गरेको छ ।
अर्कोतिर, यो फिल्मका गीत पनि निकै हिट छन् । जसमध्ये ‘रैयाँ चाँदी’को र ‘काँधे कुरी’ सर्वाधिक रुचाइएका गीत पर्छन् । यीमध्ये, आशिष अविरल र मेलिना राईले स्वर दिएको गीत ‘रैयाँ चाँदी’ले युटयुवमा लोभलाग्दो भ्यूज प्राप्त गरेको छ ।
शुक्रबारसम्म अविरलद्वारा संगीतबद्ध र नवराज पन्तको शब्द समावेश यो गीतलाई १ करोडभन्दा धेरै पटक हेरिएको छ । दोहोरी ब्याटल शैलीमा कम्पोज गरिएको यो गीत पछिल्लो समय निकै रुचाइएकोमध्ये पर्छ । फिल्मको प्रवर्धनमा पनि यो गीतले ठूलो भूमिका खेलेको निर्माता बताउँछन् ।
गीतको भिडियोलाई कथानुसार प्रस्तुत गरिएको छ । दोहोरी ब्याटलमा जसले जित्छ, उसैको घरमा जाने सर्तसहित कथा बुनिएको छ । जसमा विजय बराल, अञ्जना बराइली, मुकुन भुसाल, बुद्धि तामाङले पनि अभिनय गरेका छन् ।
फिल्मको अर्को गीत ‘काँधेकुरी’लाई ७७ लाख पटक हेरिएको छ । सरोज पौडेल निर्देशित यो फिल्म विहिबारदेखि चौंथो सातामा प्रवेश गरेको छ । फिल्मलाई सेभेन सिजनको ब्यानरमा विनोद पौडेल र प्याट्रिक सुवेदीले निर्माण गरेका हुन् ।
– यस समाचारको श्रोत : Online Khabar हो ।