बेंगलोरले जित्यो वुमन्स प्रिमियर लिगको उपाधि

काठमाडौं । रोयल च्यालेन्जर्स बेंगलोरको महिला टोलीले ‘वुमन्स प्रिमियर लिग’ (डब्लूपिएल)को उपाधि जितेको छ । फाइनल खेलमा बेंगलोरले दिल्ली क्यापिटल्सलाई ८ विकेटले हराउँदै उपाधि जितेको हो । बेंगलोरले यो उपाधि जितेको पहिलो पटक हो ।

जितका लागि ११४ रनको सामान्य लक्ष्य बेंगलोरले १९.३ ओभरमा २ विकेट गुमाउँदै पूरा गर्यो । बेंगलोरको जितमा एलिसा पेरी ३७ बलमा ४ चौकासहित ३५ रनमा नट आउट रहिन् । विजयी चौका हानेकी रिचा घोष १७ रनमा नट आउट रहिन् ।

ओपनर शोफी डेभिन २७ बलमा ५ चौका र १ छक्कासहित ३२ र कप्तान स्मृति मन्धना ३१ रनमा आउट भइन् । दिल्लीकी शिखा पाण्डे र मिन्नु मानीले १/१ विकेट लिइन् ।

त्यसअघि अरुण जेट्ली स्टेडियममा टस जितेर पहिला ब्याटिङ रोजेको घरेलु टोली दिल्ली १८.३ ओभरमा ११३ रनमा अलआउट भयो । दिल्लीकी ओपनर शफाली बर्मा २७ बलमा २ चौका र ३ छक्कासहित सर्वाधिक ४४ रनमा आउट भइन् । मेघ लानिङ २३ रनमा आउट भइन् ।

एक समय ७ ओभरमा ६४–० को अवस्थामा रहे पनि शफार्ली बर्मा आउट भएपछि दिल्लीको मध्यक्रम र तल्लोक्रम ब्याटिङ नाटकीय रुपमा पतन भएको थियो ।

बेंगलोरलाई उत्कृष्ट पूनरागमन गराउन श्रेयांका पाटिलले ३.३ आोभरमा १२ रन खर्चेर ४ विकेट लिइन् । शोफी मोलिनक्सले ३ र आशा शोभानाले २ विकेट लिइन् । बेंगलोरको पुरुष टोलीले भने २००८ देखि हालसम्म लगातार खेले पनि उपाधि जित्न सकेको छैन । तीन पटक फाइनलमा पुगेर हार्न पुगेको थियो ।

– यस समाचारको श्रोत : Online Khabar हो ।