भिटेनले छातीमा खोपाएको ट्याटुमार्फत के भन्न खोजेका हुन् ?
काठमाडौं । पछिल्लो समय र्यापर भिटेन आफ्ना गीतमा प्रहरीसँग आक्रोशित सुनिन्छन् । उनले केही समययता ल्याएका गीतका शब्द प्रहरीप्रति बढी लक्षित छन्, जहाँ उनी खनिएका देखिन्छन् ।
गीत मात्र होइन, उनी प्रहरीप्रति वास्तवमै क्रुद्ध जस्तो महसुस हुन्छन् । यसको उदाहरणको रुपमा उनले हालै छातीमा खोपेको ट्याटुका केही शब्दले उनी प्रहरीप्रति कति रिसाएका छन् भन्ने बुझ्न सकिन्छ ।
भिटेनले आइतबार इन्स्टाग्राम स्टोरीबाट सार्वजनिक गरेको एक तस्वीरमा उनको छातीभरी ट्याटु नै ट्याटु देखिन्छ । छातीमा खोपिएको ट्याटुमा लेखिएको छ, ‘द क्रिमिनल कप, किलिङ हिपहप’ (एक अपराधी प्रहरीले हिपहपलाई मारिरहेको छ) ।
उनले यो ट्याटु आफ्नो नयाँ म्युजिक भिडियो छायांकनको लागि खोपाएका हुन् या स्थायीरुपमै । यसबारे उनले जनाएका छैनन् तर, उनले आफ्नै रुचिमा यो ट्याटु खोपाएको देखिन्छ ।
‘यस्तै त हो नि ब्रो’ गीतमा छाडा शब्द प्रयोग गरेको भन्दै प्रहरीले उनलाई २०७६ कात्तिक ७ गते पक्राउ गरेको थियो । वास्तविक समीर घिसिङ भएपनि, उनी भिटेन नामले चर्चामा छन् । उनलाई प्रहरीले पक्राउपछि अभद्र व्यवहारको मुद्दा चलाएको थियो । त्यो घटनापछि भिटेन गीतमार्फत प्रहरीप्रति क्रुद्ध सुनिँदै आएका छन् ।
आइन्दा छाडा र अश्लिल गीत नगाउने सर्तमा प्रहरीले उनलाई परिवारको रोहवरमा रिहा गरेको थियो । भिटेनले अप्रिल २५ मा रिलिज गरेको नयाँ गीत ‘डन्ट जज मी’ पनि अश्लिल भएको भन्दै सामाजिक संजालमा टिप्पणी भैरहेको छ ।
– यस समाचारको श्रोत : Online Khabar हो ।